ازبکستان د تېلو او انرژۍ برخه کې افغان ځوانان روزي

خبریال وېب پاڼه/ د افغانستان شمال ته ګاونډ کې پروت هېواد ازبکستان غواړي چې د تېلو او انرژۍ برخه کې افغان ځوانانو ته روزنه ورکړي.

د ازبکستان ولسمشر شوکت میر ضیایوف د یوې ټلفوني اړیکې له لارې د افغان ولسمشر محمد اشرف غني سره د خبرو په یوه څنډه کې یاده کړه چې هېواد یې د تېلو او انرژۍ په برخه کې د افغان ځوانانو د روزلو لپاره لېوالتیا لري.

افغان ولسمشر محمد اشرف غني دا راز د ازبکستان ساینسپوهانو، لیکوالانو او هنرمندانو ته د امیر علي شېر نوایي سېمېنار ته چې په 1400 کال کې په هرات ولایت کې ترسره کیږي د ګډون بلنه ورکړه.

د ولسمشرۍ ماڼۍ له لوري په خپره شوې خبر پاڼه کې زیاته شوې چې په دې ټلفوني مکالمه کې دواړو لوریو په دوه اړخیزو همکاریو، د افغان سولې بهیر او سیمه ایزې نښلونې په اړه خبرې وکړې.

دواړه ګاونډي ولسمشران د کابل، مزار شریف او پېښور د اوسپنې پټلۍ د مطالعې د پیل په اړه هم وغږېدل او د سویلې اسیا د اتصال لپاره یې مهمه پروژه وبلله. او همدا رنګه یې د مرکزي او سویلي اسیا د اتصال د نړیوال کنفرانس د چمتووالي په اړه چې ټاکل شوې د افغانستان او ازبکستان د ولسمشرانو په مشرۍ د روان زېږدیز کال د می په میاشت کې به د ازبکستان په پلازمېنې تاشکند کې جوړ شي بحث وکړ.

ازبکستان د افغانستان شمال لور ته په ګاونډ کې هغه پروت هېواد دی چې د نورو سیمه ایزو هېوادونو په ګډون یې له د افغان حکومت او خلکو سره چال چلند او اړیکې ښې دي.

ازبکستان د افغانستان یو ښه سوداګریز ملګری هېواد دی چې د په بېلا بېلو اقتصادي تړونونو کې هم ورسره شریک دی.

 

د افغانستان زیات شمېر کرنیز تولیدات ازبکستان ته هم ځي او د ازبکستان زیات صنعتي توکي او د اړتیا وړ لومړني تولیدات افغانستان ته را واردیږي چې په دې توګه دواړه هېوادونه په راکړې ورکړې، صادراتو او وارداتو کې ښه ملګري پاتې شوي.

ګاونډی هېواد ازبکستان نه یوازې د افغانستان یو سوداګریز ملګری دی بلکې د دې په څنګ کې افغان ځوانانو ته د لوړو زده کړو لپاره هم وخت نا وخت فرصتونه برابروي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More