امریکا د کرونا ځپلو هېوادونو لومړۍ لیکه کې

خبریال وېب پاڼه/د روغتیا نړیوال سازمان د معلوماتو له مخې په ټوله نړۍ کې د کرونا قرباني تر سل زرو واوښته.

د دغه سازمان معلومات ښیي چې په دغو سل زرو قربانیانو کې امریکا د کرونا له امله د زیاتواخته شویو او قربانیاني هېوادونو په کتار کې لومړي مقام ته ورسېده. تر دې مهاله په امریکا کې د کرونا ویروس له امله څه د پاسه ۱۹ زره کسانو خپل ژوند له لاسه ورکړی او تر ۵۰۰ زرو زیات کسان پکې په کرونا ویروس اخته شوي دي.

تېره شپه یو ځل بیا د امریکا او په ځانګړې توګه نیویارک لپاره د کرونا له امله مرګونې وه چې یوازې په همدې ایالت کې یې تر ۷۰۰ زیاتو کسانو ژوند له لاسه ورکړ. تر امریکا وړاندې ایټالیا د کرونا له امله د زیاتو قربانیانو په کتار کې وه چې څه د پاسه ۱۷ زره قربانیان یې کرل خو په تېرو ۲۴ ساعتونو کې امریکا کې له ۱۶ زرو څخه ۱۹ زرو ته د قربانیو شمېره لوړه شوه. دا په امریکا کې په تېرو څو لسیزو کې د تر ټولو بوږنوونکی حالت دی.

په اروپا کې هم د کرونا مرګونې لړۍ روانه ده خو یو شمېر هېوادونه په کې د کموالي راپورونه ورکوي.ي تېره ورځ انګلا مېرکل وویل چې هېواد یې په نسبي توګه د کرونا د مثبتو پېښو د کموالي شاهد دی، تر دې وړاندې په ایټالیا، اسپانیا، برتانیا او یو شمېر نورو هېوادونو کې د کرونا د مثبتو پېښو د کموالي رېپوټونه ورکړل شوي وو.

دېخوا ته په آسیایي ځمکه کې بیا له ایران او چین وروسته د منځني ختیځ یو شمېر هېوادونه او هخوا روسیه کې د کرونا مثبتې پېښې په زیاتېدو دي.

دلته په افغانستان کې تر اوسه د کرونا د ۵۲۱ مثبتو پېښو خبر ورکړل شوی دی، چې له ډلې یې ۱۶ کسانو خپل ژوند له لاسه ورکړی او تر ۳۵ شاوخوا پورې کسان بېرته ورڅخه رغېدلي هم دي. د روغتیا د وزارت په لارښوونه د کابل په ګډون په یو شمېر ګڼ نفوذه ښارونو کې د ګرځبندیز لړۍ هم جدي شوې ده. تېره ورځ د ننګرهار، کابل او لغمان والیانو هم د دغو ولایتونو تر منځ په موټریزو کاروانونو هم محدودیتونه وضع کړل. تمه ده سر له نن شنبې څخه عملي کړل شي.

په ورته وخت کې د روغتیا نړیوال سازمان له ټولې نړۍ کې د کرونا پر وړاندې د محدودیتونو د غځېدو غوښتونکی دی. دوی وایي چې تر دې دمه د کرونا له امله نړۍ ډېره زیانمنه شوې ده او پر وړاندې یې د درملیزو او وقایوي توکو په په جوړښت کې هم د پام وړ پرمختګ نه دی شوی، نو په کار دی چې د یو څه وخت لپاره نور هم په هېوادونو کې ګرځبندیزونه وغځول شي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More