حکومت د حزب التحریر یا د داعش ملکي څانګې؟ پر فعالیتونو بندیز ولګاوه

خبریال وېبپاڼه/ وروسته له هغه چې په ټولنیزو رسنیو کې د خلافت د رامنځته کېدو او د اوسني جمهوري نظام خلاف د حزب التحریز فعالیتونه پراخ شول، افغان حکومت وايي، چې د دې افراطي ډلې فعالیتونه غیر قانوني دي او د مخنیوي لپاره به یې لاس په کار شي.

د ولسمشر لومړي مرستیال امرالله صالح د سهار شپږنیمو بجو غونډې په راپور کې ویلي چې د حزب التحریز عدلیې وزارت کې ثبت نه دی او د قانون له اړخه حق نه لري چې فعالیتونه وکړي او سترې غونډې جوړې کړي.

طالح زیاته کړې، چې د حزب التحریز د یو شمېر فعالانو او غړیو نظریه طالبانو ته ورته ده او د نظام پر ضد فعالیتونه کوي، چې حکومت به په هیڅ صورت اجازه ورنکړي.

هغه دا هم ویلي چې ډېر ژر به د دغې ډلې غړیو سره قانوني بحثونه وکړي او غږ یې پر کړی چې نور باید د نظام پر ضد له تبلیغاتو ډډه وکړي.

تر دې وړاندې د ملي مصالحې عالي شورا مشر عبدالله عبدالله هم د حزب التحریر پر فعالیتونو اندېښنه ښودلې وه او دغه ډله یې د ترهګرو ملکي څانګه بللې وه.

د حزب التحریر په نوم سازمان په ښوونځیو، پوهنتونونو، علمي او اکاډمیکو مرکزونو او نورو ټولنیزو برخو کې د ځوانانو ترمنځ پراخ فعالیتونه لري او په ټولنه کې د خلافت رامنځته کولو او د اوسني نظام ړنګولو انګېزه عاموي.

که څه هم حکومت حزب التحریز ډله طالبانو ته ورته بولي، خو د شنونکو په باور، د حزب التحریر افکار تر ډېره داعش ډلې ته ورته دي او سره له دې چې دا ډله د ترورستي سازمانونو په لست کې شامله شوې؛ خو لاهم امنیتي ارګانونه نه دي توانیدلي چې د ځوانانو او په تعلیمي مرکزونو کې د دې ډلې د فعالیتونو مخنیوی وکړي.

د دې ډلو تر شا ډېر قوي لاسونه دي او ډير امکانات ورته برابریږي، هره پنجشنبه په کابل او ولایتونو کې غونډې جوړوي او ځوانانو ته تقریرونه کوي.

دا ډله د نظام په داخل کې هم نفوس لري او د نظام د ړنګولو لپاره د خطر زنګ دی؛ ځکه داخل په نظام کې ده او د افغانستان نظامونو هر وخت د محصلینو او د علمي مرکزونو لخوا ورته د فنا بلا پيدا شوې، چې نظام ته یې سقوط ورکړی دی.

که چېرې د حزب التحریز ډلې د فعالیتونو مخنیوی و نه شي؛ دا به له تروریستي ډلو او په ځانګړي ډول له داعش سره مرسته وکړي چې دا کار به د افغانستان راتلونکي د پیکه کولو او د اوسني نظام د تخریبولو لپاره بدې پایلې له ځانه سره ولري.