خلیلزاد د سولې سفر پيل کړ؛ طالبانو د نوې جګړې اخطار ورکړ

خبریال وېبپاڼه/ وروسته له هغه چې په دوحه کې د افغان حکومت او طالبانو ډلې ترمنځ د سولې خبرو اترې بیا پیل شوې، د افغان سولې لپاره د امریکا د بهرنیو چارو وزارت ځانګړي استازي زلمی خلیلزاد بیا د سفر موزې پښو کړې.

راپورونه وايي، چې خلیلزاد به د دې سفر په لړ کې د سیمې هېوادونو په ځانګړي ډول پاکستان، هند او قطر ته ولاړ شي او د سولې په باب به د شته خندونو د له منځه وړلو هڅه وکړي.

د بایډن د واکمني پر مهال د سولې لپاره د زلمي خلیزاد دا لومړنی سفر دی.

که څه هم پر خلیلزاد نیوکې کېدې چې د سولې خبرو کې یې دوه مخی چلند ترسره کړی او له امله یې د افغان حکومت او طالبانو ترمنځ خبرې اترې پیکه او نامالوم برخلیک سره مخ دي، خو د امریکا نوي ولسمشر جوبایډن بیا هم د سولې کیسې ته خلیلزاد رامخته کړ.

دا چې د خلیلزاد نوی سفر به د سولې خبرو کې څه مثبت بدلون راولي او که نه معلومه نه ده، خو امریکا ویلي چې له طالبانو سره د سولې هوکړه یو ځل له سره تېروي او بیا یې په اړه پرېکړه کوي.

هلته بیا د طالبانو د قطر دفتر غړي انس حقاني ویلي چې که امریکا د دوحې تړون مراعت نه کړي، نو دوی به خونړۍ جګړې ته مخه کړي.

هغه ویلي چې دوی تر پخوا ډېر مجهز دي، ډرون الوتکي او توغندي لري او که د تړون خلاف کوم عمل ترسره شي، نو دا به د نوې جګړې پیل وي.

دلته بیا پر عام ولس اور بل دی او هره ورځ لسګونه بې ګناه افغانان وژل کېږي او د میندو د بورولو او د افغان اولادونو د یتیمانولو لړۍ په درز کې روانه ده.

اول خو پکار دا ده چې طالبانو او حکومت په یوه ټغر راټوله شي او نور د سولې پروسه واقعي افغاني کړي او امریکا ته پکې د مداخلې حق ورنه کړي، خو که داسې نه کوي بیا حکومت ته پکار ده چې په نوي پسرلي کې د طالبانو پر ضد پراخ عملیات پیل کړي او د ځپلو له لارې یې افغانان نور له دې مصیبته وژغوري.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More