کورنیو چارو وزارت ١٠٠٠ پولیس افسران نیولي

خبریال وېب پاڼه/ د افغانستان د کورنیو چارو وزارت زر تنه د پولیسو افسران له دندې څخه د ناوړه ګټه اخیستنې په تور نیولي دي.

د کورنیو چارو وزارت سرپرست مسعود اندرابي وايي، په تېر کال کې د کورنیو چارو وزارت د لوړ پوړو افسرانو په ګډون له زرو څخه زیات پولیسو افسران له دندې څخه د ناوړه ګټه اخیستنې په تور نیول شوي دي.

اندرابي زیاتوي، د کورنیو چارو وزارت ژمن دی چې یو مسلکي ځواک رامنځته کړي، تر څو وکولی شي د خلکو غوښتنې پوره کړي او له دندې څخه ناوړه ګټنې د زغملو وړ نه دي.

مخکې په دغه وزارت کې د اختلاس، بډو او له دندې څخه د ناوړې ګټې اخیستنې په تور د څلورو جنرالانو په ګډون د کورنیو چارو وزارت د ۱۴۶ افسرانو دوسیې لویې څارنوالۍ ته معرفي کړې وې.

څه موده مخکې د کورنیو چارو وزارت سرپرست مسعود اندرابي ویلي و، چې د پولیسو په رهبرۍ کې د ځوانو قوماندانانو په ګومارلو سره، د اعاشې د پیسو او په جګړه کې د مهماتو د بې‌ځایه مصرفولو مخنیوی شوی دی.

د اندرابي پر وینا د پولیسو ځوانې رهبرۍ په روان کال کې د اعاشې له څانګې څخه شاوخوا څلور میلیارده افغانۍ سپمولي دي.

د افغان امنیتي ځواکونو په لیکو کې د تجهیزاتو او پوځي وسایطو په اړه د محاسبې نشتوالی یو له هغو ستونزو ده، چې په کور دننه او بهر یې په اړه تل انتقادونه شوي دي.

د کورنیو چارو وزارت سرپرست په داسې حال کې د پولیسو په لیکو کې د اصلاحاتو د راوستلو خبرې کوي چې له دې وړاندې ولسمشر محمد اشرف غني دغه وزارت د فساد زړه بللی و او په دغه وزارت کې یې پر جدي اصلاحاتو ټینګار کړی وو.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More