fbpx

د بیان ازادي، یوازې حق نه، بلکې سمه کارونه یې افضل جهاد دی

د افغانستان علومو اکاډمۍ په کابل کې (د اسلامي شریعت له نظره د بیان ازادي) تر عنوان لاندې یو علمي، څېړنیز سمینار جوړ کړی و.

دې سمینار کې چې ګڼو نامتو لیکوالو، څیړنکو او علماوو د بیان ازادۍ په اړه علمي او څړنیزې مقالې ولوستې ورته د ولسمشر سربېره ګڼو وزیرانو هم خپل پیغامونه رالیږلي و، چې د بیان ازادي په کې د بشریت له مهمو حقوقو  یاده شوې وه.

دوی همدا شان ویلي و، که د بیان له ازادۍ څخه د اسلامي شریعت په رڼا کې کار واخستل شي، نو د خدای د رضا او د عدالت د تامین سبب کېدای شي.

دوی همدا شان وایي، مطلقه ازادي د بشریت په خیر نه ده، ځکه خو د اسلام مبارک دین او ټولو حقوقي نظامونو ازادي په یوه محدوده کې ساتلې ده.

مګر تر کومه چې د بیان ازادۍ ته جواز ورکړل شوی، که سمه وکارول شي، په ټولنه کې د ظلم پر وړاندې د سپر کار ورکولای شي.

خو بلخوا د افغانستان د علومو اکاډمۍ غړي، دا هم وایي، چې په یو شمیر رسنیو کې د بیان ازادۍ روح ته پاملرنه نه کیږي، چې د ګټې پر ځای يې تاوان زیات دی.

د بیان د ازادۍ په اړه دا علمي سمینار په داسې حال کې ترسره کېږي، چې د شنونکو په باور لاهم په هېواد کې د بیان د ازادۍ پر وړاندې ګڼ خنډونه موجود دي.