خلیلزاد: افغان سیاسیونو د سولې لپاره لاس راسره یو کړی

خبریال وېبپاڼه/ د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد وايي، د سولې لپاره یې کابل ته وروستی سفر ګټور و او افغان سیاسیون د بشپړ ملاتړ ډاډ ورکړی دی.

هغه په ټویټ پیغامونو کې ویلي چې کابل ته د خپل دوه ورځني سفر په لړ کې یې د سولې اړوند د امریکا طرحه، دریځ او وروستۍ پرېکړې په مفصل ډول سیاسیونو، مدني فعالانو او ګڼو نورو اړخونو سره شریکې کړې دي او هغوی هم د هر اړخیز ملاتړ ډاډ ورکړی دی.

 خلیلزاد غیر مستقیم د سولې لپاره د امریکا نوې طرحې ته اشاره کړې ده او ویلي یې دي چې افغان سیاسیون او نور ټول اړخونه د داسې سولې ملاتړ کوي چې اوربند رامنځته او د یو ځواکمن حکومت کې ټول اړخونه خپل ځان وویني او هم اوربند تامین شي.

د خلیلزاد دغه خبره د سولې اړوند د امریکا د طرحې تطبیق ته ده او دا په ډاګه کوي چې سیاسیون د سولې لپاره د امریکا له طرحې ملاتړ کوي او په دې سره سلا شوي چې موقت حکومت رامنځته او له لارې یې د جګړې ټغر ټول شي.

خلیلزاد دا هم ویلي چې د سولې په تړاو به ګڼې غونډې او کنفرانسونه نور هم جوړ کړي او د امریکا طرحه او دریځ به په دې برخه کې لا روښانه کړي، تر څو یوې دایمي سولې او ثبات ته لار هواره شي.

دا خبره د امریکا سفارت هم په یوه خپره کړې اعلامیه کې کړې او ویلي یې دي چې د افغان سولې په تړاو به له نړیوالو شریکانو سره د امریکا غونډې او کنفرانسونه دوام کوي او پوره هڅه کېږي چې په افغانستان کې روانه جګړه پای ته ورسول شي.

خلیلزاد داسې مهال د امریکا له طرحې د افغان سیاسیونو د ملاتړ خبره کوي چې لږ مخکې د ملي روغې جوړې عالي شورا مشر عبدالله عبدالله په مشري یو پلاوی د سولې اړوند د مسکو غونډه کې د ګډون لپاره روسیې ته روان شو.

داسې ښکاري چې خلیلزاد د امریکا د طرحې د تطبیق لپاره د افغان سیاسیون ملاتړ جلب کړی او د مسکو غونډه کې به په دې اړه مهمې پرېکړې کېږي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More