fbpx

د افغانستان ملي او ایمرجنګ لوبډلې هند ته روانې شوې

د افغانستان ملي او ایمرجنګ لوبډلې د تمریناتي کمپونو لپاره د هند چنای ښار ته روانې شوې.

د افغانستان کرکټ بورډ عمومي رییس عزیزالله فضلي د ملي او ایمرجنګ لوبغاړو له روانېدو وړاندې له دوی سره ناسته وکړه او ورته یې د لاسته راوړنو او بریاوو هیله څرګنده کړه.

ښاغلي فضلي وویل: تاسو د ټول افغانستان استازیتوب کوی او ټول افغانان له تاسو ډېرې هیلې لري، هیله ده چې تاسو له دغه تمریناتي کمپ ډېر څه زده کړی او له نورو لوبډلو سره د لوبو پر مهال افغانستان تر بریا ورسوی.

ښاغلي فضلي دغه راز وویل چې د کرکټ بورډ اداره به خپلو لوبغاړو ته هر ډول اسانتیاوې برابروې چې سربېره پر دې یې په اسیا جام ایمرجنګ سیالیو او راتلونکي نړیوال جام کې د افغانستان د ملي او ایمرجنګ لوبډلو لپاره د لاسته راوړنو او ځلېدو استدعا وکړه.

د ایمرجنګ لوبډلې د ۱۹ ورځني تمریناتي کمپ موخه د اسیا د راتلونکي ایمرجنګ کمپ لپاره چمتووالی او د لوبډلې غوره کول دي.

د کمپ په ترڅ کې به روزونکي د لوبغاړو د فیټنس او تخنیکونو د پیاوړي کولو هڅه وکړي، سربېره پر دې به ایمرجنګ لوبډله د افغانستان له ملي لوبډلې سره ۵ پنځوس اوریزې لوبې هم وکړي او په پایله کې به د ایمرجنګ لوبډلې له ۲۴ لوبغاړو ۱۵ لوبغاړي د اسیا د ایمرجنګ جام سیالیو ته غوره شي.

د اسیا ایمرجنګ جام سیالۍ د روان زېږدیز کال د دسمبر پر ۵ مه نېټه په سریلانکا او پاکستان کې پیلیدونکې دي چې د افغانستان، هند، پاکستان، سریلانکا، هانګ کانګ، بنګله دیش، متحده عربي اماراتو او عمان لوبډلې پکې ونډه لري.

ملي لوبډله:  د افغانستان ایمرجنګ لوبډلې سربېره د هیواد ۲۴ کسیزه ملي لوبډله هم د یو میاشتني تمریناتي کمپ لپاره هند ته ولاړه چې موخه یې د ۲۰۱۹ نړیوال جام سیالیو ته د تمریناتو د لړۍ پیلول دي.

په دغه کمپ کې به روزونکي له لوبغاړو سره کار وکړي چې خپل فیټنس ښه کړي، مسلکي تخنیکونه پیاوړي او لوبیزې وړتیاوې لوړې کړي، ملي لوبډله به د افغانستان له ایمرجنګ لوبډلې سره ۵ یو ورځنۍ سیالۍ وکړي، سربیره پر دې به ۳ دوستانه سیالۍ د هند د چنای له لوبډلو سره او دوه نورې سیالۍ په خپل منځ کې تر سره کړي.

په هند کې به د افغانستان د ملي لوبډلې تمریناتي کمپونه پړاو په پړاو د ۲۰۱۹ م کال تر فبرورۍ میاشتې پورې روان پاتې شي.