fbpx

ټرمپ پر پاکستان سختې نیوکې وکړې

له فکس نیوز تلویزیون سره په مرکه کې ټرمپ له ډېرې مودې وروسته پر پاکستان سختې نیوکې وکړې او پر دې هیواد یې د تروریزم د ملاتړ په خاطر د مرستو د بندولو دفاع وکړه.

د امریکا ولسمشر ټرمپ وايي چې پاکستان نه یوازې دا چې د امریکا لپاره هیڅ نه کوي، د القاعده له مشر سره یې مرسته کړې وه چې د ایبټ اباد په پوځي ښار کې پټ شي.

د امریکا ولسمشر ټرمپ وویل«موږ پاکستان ته، چې بن لادن پکې اوسېده، د کال ۱۳ سوه ملیون ډالر ورکول، موږ د پاکستان ملاتړ کاوه، موږ دوی ته هر کال ۱ ملیارد او ۳ سوه ملیون ډالر ورکول خو نور یې نه ورکوو، ما دا پیسې په پاکستان د دې لپاره بندې کړې چې دوی زموږ لپاره هیڅ هم نه کول.»

د امریکا حکومت تېره میاشت پاکستان ته ۳۰۰ ملیون ډالره پوځي مرسته هم لغوه کړه ځکه چې د واشنګټن په وینا اسلام اباد په خپله خاوره کې د فعالو تروریستي ډلو خلاف کافي اقدامات نه کوي.

د امریکا ولسمشر له فکس نیوز سره په مرکه کې افغانستان او عراق ته د خپل سفر د پلان یادونه هم وکړه خو په امنیتي ملحوظاتو یې د خپل سفر نېټه ونه ښوده.

ټرمپ پر پاکستان په داسې وخت کې نیوکې وکړې چې له نښو نښانو داسې ښکاري چې طالبانو او امریکایانو د سولې په خبرو کې پرمختګ کړی او لېرې نه ښکاري چې د افغانستان د حکومت او طالبانو ترمنځ د سولې او اوربند خبرې بیل شي.