fbpx

ولسمشر غني نن په ټول هیواد کې د ملي ماتم اعلان کړی

د ارګ د یوې خبرپاڼې په خپرولو سره ویلي چې د افغانستان ولسمشر نن چهارشنبه  د ویر ورځ اعلان کړې ده.

د افغان ولسمشر محمد اشرف غني په کابل کې د میلاد النبي په مناسبت د دیني عالمانو په غونډه کې د انتحاري حملې په نتیجه کې د څه باندې ۵۰ تنو د شهادت له کبله عمومي ویر اعلان کړ.

په دې مناسبت به په هیواد کې دننه او په ټولو بهرنیو هیوادونو کې د افغانستان په دیپلوماتیکو مرکزونو کې د هیواد ملي بیرغ نیم ځوړند وي.

د کابل په برید کې، چې په اورانوس هوټل کې وشو، تر ۵۳ تنو زیات شهیدان شوي او شاوخوا ۸۰ نور ژوبل شوي دي.

خبرپاڼه کاږي ښاغلي غني دا برید په کلکه غندلی او ویلي یې دي«د میلاد النبي او د اسلام د ستر پیغمبر د افکارو په اړه پر غونډه تروریستي حمله له اسلامي ارزښتونو او د نبي اکرم (ص) له سنت او طریقې سره دښمني ښيي.»

بلخوا اجرائیه رییس عبدالله او نورو چارواکو سربیره، د افغانستان د دیني عالمانو شورا د میلاد النبي پر محفل دا برید غندلی او دایې د اسلام د دښمنانو کار بللی دی.

په ورته وخت کې د بښنې نړیوال سازمان، ملګرو ملتونو، په کابل کې د امریکا سفارت او نورو نړویوالو ادارو هم دا برید په سختو ټکیو غندلی دی

په ورته وخت کې وسله والو طالبانو د يوې اعلاميه په خپرولو سره یاده خونړۍ پيښه غندلې دی.  

یاده دې وي چې پرون یو ځانوژونکي بریدګر، د ماښام د شپږو بجو او لس دقیقو په شاوخوا کې د کابل د ۱۵مې ناحیې په مربوطاتو کې د اورانوس په هوټل کې د میلاد النبي مراسم په نښه کړل چې په کې یو شمېر دیني عالمان او عام افغانان راټول شوي وو.