fbpx

ختیځ کې والیانو د اقتصادي پروژو د پیل په اړه ناسته وکړه

د ختیځو ولایتونو د والیانو او د جمهور رییس ستر سلاکار ښاغلي څرګند په ګډون د موثرو اقتصادي فرصتونو په رامنځته کیدو د همغږۍ ناسته ترسره شوه.

دغه ناسته چې د نورستان ولایت په مرکز پارون کې ترسره شوه، پکې د جمهور رییس د زیربنايي او انکشافي چارو ستر سلاکار پوهاند څرګند، د لغمان والي محمد اصف ننګ، د کونړ والي عبدالستار میرزکوال، د نورستان والي حافظ عبدالقيوم، د ننګرهار مرستیال والي تمیم عارف مومند د كلوپراختيا، اوبو او بریښنا، کرنې اومالداري، چاپيريال ساتنې وزارتونو معینانو دټولګټووزارت دسروي او ډيزاين عمومي رييس او د یادو څلورو ولایتونو د کرنې او اوبو لګولو ریاستونو مسوولینو ګډون کړی و.

د زون په کچه د اقتصادي او رغنیزو پروژو د پیل په اړه دغه ناسته کې په ګڼو سترو او کوچنیو پروژو بحثونه ترسره شول.

د ختیځو ولایتونو والیانو لومړی په خپل وار سره د ټولو هغو پرژو یادونه وکړه چې یو دبل سره مشترکې دي او باید په همغږۍ سره یې چارې مخته یوړل شي.

د لغمان والي ښاغلي محمد اصف ننګ په دغه ناسته کې په دې ولایت کې د شاهي کانال، وطن ګټو او د کله ګوش د بریښنا بند او زخیرې سربیره یو شمېر نورو پروژو يادونه هم وکړه چې د کارونو په بشپړیدو سره به یې نه یواځې لغمان بلکې ګاونډي ولایتونه هم له سترو استانتیاوو برخمن شي.

همدارنګه د کونړ، نورستان او ننګرهار ولایتونو مسوولینو هم په خپل وار د اقتصادي فرصتونو په رامنځته کیدلو کې د زون په کچه پر همغږۍ ټینګار وکړ.

د جمهور رییس د زیربنايي او انکشافي چارو ستر سلاکار پوهاند څرګند په خپلو خبرو کې وویل، چې ختیځ ولایتونه په بیلا بیلو برخو کې د زیربنا او انکشاف لپاره ستر فرصتونه لري او دوی کوښښ کوي چې په دې څلورو ولایتونو کې سترې پروژې پیل او په خپله په پښو ودریږي.

نوموړي راغلي پلاوي ته لارښوونه وکړه چې د ختیځو ولایتونو له والیانو سره دې په شریکه هر ولایت کې هغه پروژې چې یادونه یې وشوه چارې تعقیب او راپور یې له ولسمشرۍ ماڼې سره شریک کړي.

همدارنګه په دغه ناسته کې په ګڼ شمېر نورو موضوعاتو هم د مسوولینو له لوري خبرې او د نظر تبادله وشوه.