fbpx

سپګ:په کابل کې د علماو پرغونډه برید ستر بشري جنایت دی

د ربیع اول د ۱۲ مې (د میلاد نبي ص ) په مناسبت جوړشوې غونډه کې چاودنه د بشر او اسلام ضد کړنه ده.

تيره ورځ سه شنبه کابل کې د اورانوس هوټل په تالار کې د علماو له لوري په جوړه شوې غونډه کې چاو دنه شوې چې  لسګونه بیګناه انسانانو ته  يې مرګ ژوبله اړولې ده.

د ملکي وګړو د خوندیتوب او عدالت غوښتنې ګروپ دغه خونړی برید چې پکې د هیواد ۵۰ عالمان، مخور، سپین ږيري او نور ملکي کسان شهیدان شول او له ۸۰ زیات پکې ټپیان شول، په کلکو ټکو غندي او د سولې د مخالفینو دغه عمل د ټولو اسلامي، او انساني اصولو خلاف بولي.

 CPAG یا د ملکي وګړو د خوندیتوب او عدالت غوښتنې ګروپ د ملي یوالي پرحکومت غږ کوي چې د دغه زړه بوږ نوونکي برید څېړنه وکړي او د عاملینو په پیدا کولوکې يې د هر ډول کورني او بهرني قوت نه کار واخلي تر څو د پېښې عاملین پیدا او په خپله جزا یې ورسوي.

 سيپګ په جګړه کې له ټولو ښکېلو غاړو او ډلو څخه غواړي چې پر ملکي ځایونو، مذهبي اماکنو او ملکیانو دې بریدونو ودروي .

همدارنګه له حکومته هم غواړي چې د مذهبي غونډو د امنیت ساتنې ته جدي پاملرنه وکړي .

د ملکي وګړو د خوندیتوب او عدالت غوښتنې ګروپ د دغې پېښې له قربانیانو سره په غم کې خپل ځان شریک ګڼي ، شهیدانو ته جنت فردوس او ټپیانو ته د عاجلې شفا او روغ صحت غوښتنه کوي.