د کورنیو چارو وزیر: د پولیسو له لیکو غیر مسلکي کسان وباسو

خبریال وېبپاڼه/ د کورنیو چارو سرپرست وزیر حیات الله حیات خبر ورکوي، چې د پولیسو له لیکو به ټول هغه غیر مسلکي کسان وباسي، چې په اړه یې شکایتونه موجود دي.
حیات په تورخم ښارګوټي کې د ذاکر په نوم د پولیسو د یوه افسر لخوا له خلکو سره د ناوړه چلند په غبرګون کې ویلي :(( د پولیسو په لیکو کې غیر مسلکي کسانو ته ځای نشته.))
نوموړي په خپله فیسبوک پاڼه لیکلي، چې نن سهار په تورخم ښارګوټي کې د ذاکر په نوم د پولیسو یوه افسر له خلکو سره ناوړه چلند کړی و، چې ژر تر ژره ونیول شو او قضیه یې تر څېړنې لاندې ده، چې قانوني چلند به ورسره وشي.
هغه زیاته کړې، هر هغه اشخاص او یا کړۍ چې د پولیسو له نوم او مقدس لباس څخه ناوړه ګټه اخلي، هیڅکله به د پولیسو په سپېڅلیو لیکو کې ځای ونه لري او پر ځای به یې مسلکي کسان په دندو وګمارل شي.
کورنیو چارو وزیر یادونه کړې، چې د پولیسو په لیکو کې د غیر مسلکي افرادو د شتون او د ځینو منسوبینو د ناغېړۍ او ناوړه چلند په اړه شکایتونه شته، خو وخت غواړي چې اصلاح شي.
ده له خلکو هم غوښتي، چې د دښمن د تبلیغاتي جنګ برخه ونه ګرځئ او د پولیسو په لیکو کې د اصلاحاتو لپاره خپل نظریات ورسره شریک کړي، نه دا چې دښمن ته دا موقع ورکړي چې د نظام او ټولو امنیتي ځواکونو نوم بد کړي.
د کورنیو چارو وزیر خبر ورکړی چې د پولیسو په لیکو کې د اصلاحاتو په موخه ګټورې اصلاحي برنامې په پام کې لري، چې د تطبیق له لارې به یې له پولیسو ستاسو د رضایت او باور کچه لوړه شي.
څو ورځې وړاندې هم په تورخم ښارګوټي کې یوه پولیس له خلکو سره ناوړه چلند کړی وو، چې د کورنیو چارو وزارت په خبره، د تل لپاره له نظامه وایستل شو.
کورنیو چارو وزارت ته چې هر وزیر راغلی، د پولیسو په لیکو کې یې د اصلاحاتو خبره کړې، خو اوس هم خلک له پولیسو شکایتونه لري.
دا چې د کورنیو چارو نوی سرپرست وزیر به دې برخه کې د پام وړ بدلون راولي او که نه؟ قضاوت نه شي کېدای، خو له وروستیو اقداماتو یې داسې ښکاري چې دې برخه کې جدي دی.