fbpx

پاکستان کې د مجاهدينو مشر ونيول شو، سبا به زبردست احتجاجونه وي

په پاکستان کې د پاکستاني مجاهدينو مشر خادم حسېن رضوي د پاکستان پوځ نيولى او له ځان سره يې بيولى دى.

د پاکستاني رسنيو د راپورونو په وينا، د تحريک لبېک پاکستان مشر خادم حسېن رضوي د خپلې کور د حجرې څخه نيول شوى او بندي دى.

د پاکستان د اطلاعاتو وزير فواد چودري په ټويټر باندې ليکلي، چې خادم حسېن رضوي يې د دې لپاره نيولى، چې د ٢٥مې نېټې احتجاجونه بند کړي. هغه ليکي، خادم حسېن رضوي د مذهب په نوم خلکو ته تاوان رسوي او حکومت به د خلکو ساتنه په هر حالت کې کوي.

ويل کېږي چې د مجاهدينو نور ډېر مشران هم نيول شوي دي او ځاى پر ځاى په جوماتونو باندې هم چاپې وهل کېږي او د تحريک لبېک پاکستان مجاهدين نيول کېږي.

په ډېرو ځايونو کې د تحريک لبېک پاکستان مجاهدينو د پاکستان ګوډاګي پوځ، رېنجر او پوليسو سره نښتې هم کړي دي، چې تر منځ يې ډزې هم تبادله شوي دي.

د تحريک لبېک مشر خادم حسېن رضوي له خپلو مجاهدينو غوښتنه کړې ده، چې سبا (٢٥ نېته) باندې دې ټول راووځي، پراخ احتجاجونه دې وکړي او ټول پاکستان دې وتړي.

د تحريک لبېک مجاهدينو په ټولنيزو رسنيو ويلي دي، چې سبا ورځ به د عمران خان د حکومت لپاره ډېره خطرناکه ثابته شي او دوى به په ټول پاکستان کې احتجاجونه وکړي.

دوى وايي چې د پاکستان د پوځ مشر قاديانى او مرتد دى او د صدراعظم عمران خان يهودي دى او د دې د ختمولو لپاره به دوى په اسلامي جذبه تر اخري سلګۍ پورې احتجاجونه کوي.

دوى وايي چې د پاکستان پوځ او حکومت د يوې داسې ښځې لپاره عالمان نيسي، چې هغې د اسلام د پېغمبر سپکاوى کړى دى او د پاکستان مرتد پوځ او حکومت اوس غواړي چې هغه له دې توره پاکه کړي او له پاکستان څخه يې وباسي، چې دا دوى ته په هېڅ ډول د منلو نه ده.