حیات: د کابل ښار د امنیت د ټینګښت لپاره د نوي پلان خبر ورکړ

خبریال وېبپاڼه/ سره له دې چې د کابل ښار د امنیت د ټینګښت مسوولیت له تېرو څو میاشتو راهیسې د ولسمشر محمداشرف غني لومړي مرستیال امرالله صالح اخیستی، خو اوس هم له دغه ښاره وخت ناوخته د ناامنیو راپورونه ورکول کېږي.

اوس تازه د کورنیو چارو سرپرست وزیر حیات الله حیات د کابل ښار د ډاډمن امنیت او عمومي نظم د تامین لپاره د نوې برنامې د پلي کېدو خبر ورکړ، چې په وینا یې له دې سره به د امنیتي وضعیت له اړخه د خلکو شکایتونه کم شي.
حیات پر خپله فیسبوک پاڼه لیکلي، چې د کابل د امنیتي وضعیت د سمون په خاطر یې نوې برنامه ترتیب کړې، چې په مرسته به یې ښاریان په بېلابېلو برخو په ځانګړي ډول د جنايي جرمونو د کموالي شاهدان واوسي.
هغه زیاته کړې:(( کابل د هېواد د پلازمېنې په توگه تر ټولو پر نفوسه ولایت دی او موږ به دلته ډېر ژر د عمومي امن او نظم د لا تامین لپاره ځانګړې برنامه پلې کړو.))
که څه هم نوموړي د یادې برنامې د جزییاتو په هلکه مالومات نه دي ورکړي، خو په خبره یې، د قانون د تنفیذ او عامه امن او نظم د تامین لپاره یې ځانګړې برنامه ترتیب کړې، چې لومړی به یې په کابل او بیا په نورو لویو ولایتونو کې پلې کړي.
په ورته وخت کې د کورنیو چارو وزیر تېر ماښام د کابل ښار له درېیمې حوزې هم کتنه کړې او د پولیسو منسوبینو ته یې هدایت کړی، چې د ترهګرو، زورواکو او قانون ماتوونکو په وړاندې له زغم کار وانخلي او خلکو ته د امنیت د ټینګښت په خاطر خپلې هڅې لا ګړندۍ کړي.
له تېرو څو میاشتو راهیسې د کابل ښار د امنیت مسوولیت د ولسمشر لومړي مرستیال امرالله صالح اخیستی، خو بیا هم وخت ناوخته د ناامنیو راپورونه ورکول کېږي.
اوس تمه شته چې د کورنیو چارو نوی وزیر حیات الله حیات به د کابل ښار د امنیت د ټینګښت لپاره د نوې برنامې د پلې کېدو له لارې عمومي امن او نظم کې مثبت بدلونونه راولي، تر څو حداقل جنايي او ترهګریز فعالیتونه کم او حداقل د خلکو سر خوندي وي.
ولسمشر غني څه باندې درې اوونۍ وړاندې حیات الله حیات د کورنیو چارو د سرپرست وزیر په توګه وټاکه، چې د چارو د شنونکو په باور، د حیات تېر ماموریت او له خلکو سره د نوموړي اړیکو ته په کتو ښايي دا دروند بار تر منزله ورسوي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More