بریتانیا: ښايي طالبان د مې په لومړۍ نېټه په بهرنیانو بریدونه پیل کړي

خبریال وېبپاڼه/ په کابل کې د بریتانیا سفارت وايي، چې ښايي وسله وال طالبان د مې میاشتې له لومړۍ نېټې وروسته په افغانستان کې پر مېشتو بهرنیو ځواکونو بریدونه له سره پیل کړي.

یاد سفارت د یوې خبرپاڼې په خپرولو سره ویلي چې د مې میاشتې په لومړۍ نېټه د طالبانو او امریکایانو ترمنځ د دوحې تړون نېټه پوره کېږي، ځکه خو ښايي دغه ډله د بهرنیانو پر وړاندې خپل بریدونه له سره پیل کړي.
یاد سفارت په خپرې کړې خبرپاڼه کې خپلو اتباعو ته خبرداری ورکړی دی چې د امنیتي ملحوظاتو له امله دې هر څه ژر له افغانستان څخه ووځي، څو حداقل ژوند یې خوندی وي.
خبرپاڼه کې له بریتانوي اتباعو غوښتنه شوې ده چې د افغانستان ټولو ولایتونو ته دې له سفر څخه ډډه وکړي او پخپلو اډو کې دې پاتې شي، څو د طالبانو له بریدونو سره مخ نه شي.
دا خبرداری وروسته تر هغه دی چې طالبانو د ولسمشر بایډن له لوري تر سپټمبر میاشتې پورې د سرتېرو د وتلو غبرګون کې ویلي چې امریکا د دوحې هوکړه نقض کړې او د بدو عواقبو پړه به یې هم د همدوی پر غاړه وي.
طالبانو ویلي چې دوی به د دوحې تړون د نقض په صورت کې پر امریکايي او نورو بهرنیو ځواکونو سخت بریدونه پیل کړي، چې مسوولیت به یې د امریکا په غاړه وي.
هلته بیا امریکا ویلي چې د سپټمبر میاشتې پورې خپل سرتېري وباسي او تر هغه مخکې یې ایستلو ته تدابیر نه لري. د دې ترڅنګ امریکا ویلي چې د خپلو سرتېرو د ایستلو لپاره به نور سرتېري هم افغانستان ته را ولي، څو دغه پروسه خوندي ترسره شي.
که څه هم مالومه نه ده چې طالبان به د مې میاشتې تر لومړۍ نېټې وروسته په امریکايي ځواکونو بریدونه پیل کړي او که نه، خو د تر دې وړاندې ګڼو نړۍوال بنسټونو طالبان یوه بې باوره ډله یاده کړې او یلي یې دي چې هڅکله به په خپلو ژمنو ونه درېږي.
طالبانو د دوحې له تړون وورسته تر ننه پر بهرنیو ځواکونو هیڅ ډول برید نه دی کړی خو د افغان ځواکونو خلاف یې جګړه توده ساتلې.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More