بالاخره پاکستان منلې چې افغان جګړه د دوی په زیان ده

خبریال وېبپاڼه/ که څه هم پاکستان کلونه کلونه د طالب اورپکو د ملاتړ له لارې په افغانستان کې جګړه روانه ساتلې، خو اوس یې تازه د روانې جګړې په اړه نادرې څرګندونې کړې دي.
د پاکستان لوړ پوړي چارواکي محمد صادق خان منلې، چې افغانستان کې جګړه پاکستان ته په زیان ده او د سوله ییز افغانستان شتون کولای شي، چې د پاکستان اوسني اقتصادي وضیعت ته تغییر ورکړي.
هغه ویلي چې هېواد به یې تر وسه وسه هڅه وکړي چې د افغان سولې په برخه کې رښتینی رول ولوبوي، تر څو روان اور چې پاکستان ته یې هم زیان رسېږي، نور مړ شي.
د پاکستان لپاره د ولسمشر ځانګړي استازي محمد عمر داودزي ویلي، چې کابل ته د پاکستان د راغلي پلاوي مشر محمد صادق له بېلابېلو افغان چارواکو سره لیدلي او په دوه اړخیزو همکاریو، د دواړو هېوادونو پر اړیکو او له افغانستان څخه د امریکايي ځواکونو پر وتلو یې خبرې کړې دي.
داودزي زیاته کړې، چې په یاده لیدنه کې ټینګار شوی، چې د افغانستان او پاکستان ترمنځ به د اړیکو د ټینګولو لپاره هڅې زیاتیږي، ترڅو دواړه هېوادونه یو له بل سره دوستانه روابط ولري.
د نوموړي په خبره په دې سفر کې صادق خان ویلي، چې پاکستان له افغانستان سره د ښو اړیکو غوښتونکی دی او هیڅ وخت به په یاد هېواد کې د جګړې پلوي ونه کړي.
په دې وروستیو کې د پاکستان ځینې لوړ پوړو چارواکو له افغانستان سره د ښو اړیکو جوړولو په موخه هڅې پیل کړي او ښايي د سولې لپاره به ښه نیت څرګندوي.
سره له دې، چې یاد هېواد هیڅ وخت د افغانستان لپاره ښه نیت نه لري؛ خو اوس پوښتنه دا ده، چې ایا رېښتیا به هم پاکستان دا ځل له افغانستان سره د ښو اړیکو غوښتونکی وي او که یو ځل بیا به د دوستي په جامه کې د دوښمن رول ولوبوي؟ د دې پوښتنې ځواب به وخت ووايي، خو د پاکستان په دوستي شک پکار دی.
څو ورځې وړاندې ولسمشر غني هم پاکستان ته خط کش کړ او ویې ویل چې د دوستي او دښمني انتخاب دې وکړي، څو خبره ښکاره شي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More