کندهارمهمند روغتون کې (۶) ډاکتران په کرونا اخته شوي
خبریال ویب پاڼه – دافغانستان د کندهار ولایت په مشهوره او د سهولتونو له مخي تر ټولو پرمخ تللي مهمند روغتون کې (۶) ډاکتران په کرونا ککړ شوي دي. شکمنې پېښي ډېري دي خو د ۶ د کرونا نتیجې مثبتي را وتلې دي .
د مهمند روغتون یوه کارکونکي خبریال ویب پاڼې ته وویل چې ډاکترانو هغه مهال ټیسټونه وکړل چې د مهمند روغتون د مالک حاجي صدیق د پلار ټیسټونه مثبت شول .
د حاجي صدیق بابا له بیلا بیلو ناروغیو کړېدو او په روغتون کې بستر کړل شو . د خبریال ډاټ کام سرچینه وايي چې وروسته له هغه چې د حاجي صدیق پلار کې د کرونا نخښي ولیدل شوې ټیسټونه ورته وشول او د دغه ناروغ د ټیسټونو د مثبت راتګ وروسته ۶ ډاکترانو ټیسټونه وکړل چې د شپږ واړو نتیجه مثبته راووته .
دا ډاکتران اوس قرنطین کړل شوی او د مهمند روغتون مالک حاجي صدیق په په خوندي ځای کې ساتلي دي .
د مهمند روغتون ګڼو نورو ډاکترانو د کرونا په تړاو د ټیسټونو هڅه کړې ده ؛ خو په کندهار کې د کرونا ټیسټ سینټر کې د موادو د کمښت له کبله دروغتون نورو ډاکترانو ته ټیسټونه نه دي شوي .
د کندهار په مهمند روغتون کې د خبریال ډاټ کام سرچینې وايي چې ډاکترانو بیا بیا د روغتون مالک حاجي صدیق ته ویلي چې روغتون باید وتړل شي؛ خو د روغتون مالک دا خبره نه مني .
موږ هڅه وکړه چې د کندهار د مهمند روغتون نه ددوی رسمي غبرګون تلاسه کړو ،خو ونه توانېدو .
د کندهار ډېری اوسېدونکو په یوه خوله د کندهار له ولایتي ادارې او د روغتیا له وزارت نه غوښتي چې مهمند روغتون دي بند کړل شي .
که څه هم مهمند روغتون په کندهار کې په نورو برخو کې بریالی روغتون بلل کېږي؛ خو د کرونا ناروغي سره د مقابلې په ډګر کې د افغانستان د نور روغتیا يي سیستم په څېردوی هم پرمختللي وسایل او د روغتیا پالانو لپاره اسانتیا وي نه لري .
روغتونونه چې په ټوله نړۍ کې د کرونا وایرس د خپراوي او ګڼې ګوڼې مرکزونه دي؛ که په داسي وخت کې هم فعالیت کوي چې ګڼ ډاکتران یې له کرونا ناروغي کړېږي ، د کرونا وایرس په خپراوي کې لویه ونډه لرلای شي .
کندهار چې تر هرات او کابل راوروسته د کرونا بل ځپلی ولایت دی ؛ خلک وايي چې حکومت دي د ورته روغتونونو خلاف بیړنی او جدي ګام اوچت کړي .
Comments are closed, but trackbacks and pingbacks are open.