fbpx

کرکټ‌ بورډ د کمېشن کارانو په منګولو کې!

د افغانستان کرکټ بورډ د هیواد د نورو ادارو برخلاف له ګټې ‌وټې ډکه یوه اداره ده. د دغې ادارې اداري مشران له پیل نه یو پر بل دا تورونه لګوي چې ګوا کې له لوبغاړو کمیشنونه اخلي او د هغوی په ونډه کې ځانونه شریک ګڼي.

دا کمېشن کاران عادي‌ خلک نه، بلکې ‌د کرکټ بورډ لوړ رتبه مامورین دي چې تر ډېره یې ټول لوبغاړي‌ پېژني. کمېشن کاران چې په ټوله کې په فيصدي ‌کې سره شریک دي، خو په سر کې یو نوم ډېر لاس پر لاس کېږي چې هغه د شفیق ستانکزي دى.

ستانکزي په کرکټ کې په نړۍ واله شورا کې ځانته په زړه پورې لابنګ کړی، او د ده د لابنګ په پایله کې نوموړی په اسانۍ ‌سره د بهرنیو اړیکو مزي د کرکټ مشرتابه ته نه سپاري. ښايي دا علت به وي چې لا هم تر اوسه پر همدغه څوکۍ ناست پاتې دى.

ستانکزی په لس فيصده کمېشن مشهور دی چې له لوبغاړو یې اخلي.

اوس دا کمېشن څه دى؟

دا کمېشن په لویه پیمانه له هغو لوبغاړو اخیستل کېږي چې د نورو لیګونو لپاره معرفي ‌کېږي او تر ډېره په لویو پیسو پلورل کېږي. بله برخه کمېشن دا دی چې د لوبغاړو له سفرونو څخه د هغوی له هغو پیسو اخیستل کېږي، ‌چې دوی ته د سفرلپاره ورکول کېږي او یا د میچ د فیس په نوم یادېږي. د کرکټ بورډ دغه کمېشن ته اوس د افغانستان یوه انتهايي لوړرتبه مامور هم لاس وراچولی دی، چې په راتلونکو کې به یې نوم افشا شي. دغه مامور هم د کرکټ بورډ له کمېشن نه خپله حصه غوښتې ده.

د حکومت دا لوړرتبه مامور د کرکټ بورډ له مشرانو سره بهر په دوبۍ کې ناستې ‌کړي‌ دي او دوی ته یې پر خپلو څوکیو د پاتې کېدو او ده ته د کمېشن ورکولو خبره کړې ده.

د افغانستان د (۳) مشهوره لوبغاړو داسې شواهد شته چې کمېشنونه یې ورکړي دي. البته هغه به هم پر خپل وخت درسره شریک کړو.

د کرکټ بورډ پخوانی مشر ښاغلی مشعل په دې تورن دی چې په لوی اختلاص او کمېشن کې لاس درلود، خو د اوسني مشر ښاغلي عزيزالله فضلي په تړاو یوازې‌ د دوو قضیو راپورونه تر لاسه شوي دي چې وروسته به یې درسره شریک کړم. خو د اجرایوي مشر ښاغلي‌ شفیق ستانکزي په خلاف د افغان کرکټ ‌بورډ د لوبغاړو کره اسناد شتون لري.

شفیق ستانکزي‌ د هند نوي ‌لیګ ته د لوبغاړو د معرفي ‌کولو په نیت له هغوی لس فيصده کمېشن غوښتی او ورته ویلي يې دي ‌چې په دې کمېشن کې نور دوستان هم راشریک دي. نویو لوبغاړو د کمېشن ورکړه ورسره منلې ده. تراوسه د لوبغاړو پر اجازت پاڼه لا د کرکټ بورډ مشر لاسلیک نه دی ورکړی، خو د لاس لیک وروسته به زه هڅه وکړم چې ځینې‌ ثبت شوي غږونه چې د هند ليګ په تړاو له ښاغلي ستانکزي ریکارډ شوي دي له تاسو سره شریک کړم.

په کرکټ بورډ ‌کې له کمېشن پرته د ځینو ځورونو رپورټونه هم ترلاسه شوي دي، چې ښايي وروسته به رسنۍ پرې خبري شي.

افغان کرکټ بورډ د هیواد یوه ملي اداره ده باید ملي ‌پاتې شي‌، کنه ښايي دا اداره هم د افغانستان د فوټبال د ادارې په څېر په نړۍ واله کچه افغانستان وشرموي.

لیکواله :‌ زرغونه فریال

ـــــــــــــــــــــــــــــــــ

ليکنه د ليکوال خپل نظر دى، لازمه نه ده چې د خبريال اداره دې ورسره همغږې وي. تاسې هم کولاى شئ چې موږ ته مو خپلې ليکنې د خپراوي لپاره راولېږئ. زموږ برېښناليک: khabarialweb@gmail.com