ننګرهار کې د زیتونو حاصلات مخ پر زیاتېدو دي

خبریال وېب پاڼه/ سږکال به ننګرهار کې د زيتونو حاصلات څو برابره زيات وي.

د ننګرهار وادې کرنيز شرکت مسئوولين وايي، چې سږکال به د زيتونو حاصلات د تېرو کالونو په پرتله څو برابره زيات وي.

د هډې فارم امر سيد اغا مياخېل وايي، چې سږکال يې ۸۷۷ هکټاره ځمکه کې د زيتونو د بوټو په مسلکي او عصري ډول پالنه کړې او هيله يې وښوده، چې د تېرو کالونو په پرتله به د زيتونو حاصلات څو برابره لوړ وي.

د يادونې ده، چې د ننګرهار وادې کرنيز شرکت اړوند زيتونو فابريکه کې هر کال د زيتونو له پروسس څخه تېل او اچار توليديږي او د هېواد سربيره بهرنيو هېوادونو ته هم لېږل کيږي، چې هلته ښه بازار لري.

بل خوا بیا د ۴۵۹ میلیونه کرنیزو پورونو ورکړه منظور شو.

د کرنیزو پورونو د منظورۍ د کمېټې غونډه، له وړاندې شویو معلوماتو او د کمېټې د غړو پوښتنو ته د قناعت وړ ځوابونو ورکولو وروسته د ۴۵۹میلیونه کرنیزو پورونو ورکړه منظور او تایید کړه.

اووه مورده پورونه منظور شوي، چې څلور مورده یې د بامیان کوپراټیفونو اړوند دي، چې په کې بېلابېلې برخو له ډلې د اوړو د تولید په پار د غنمو پېرل، د ماشینونو پېرل، د ټراکټورونو او کرنیزو توکو پېرل، په بامیانو کې د کچالو د کرکېلي په پار د کچالو تخمونه او کیمیاوي سرې پېرل، صادراتو لپاره وچې مېوې پېرل او پر بزګرانو نغدې پیسې وېشل شامل دي.

دکرنې په وزارت کې د کرنې د پراختیا د صندوق د پورونو د منظورۍ کمېټې غونډه د کرنې، اوبولګولو او مالدارۍ وزارت د تخنیکي معینیت سرپرست او د پورونو د منظوری د کمېټې مشر محبوب الله ننګ او د کرنې وزارت د پلان او پالیسۍ د رییس او د کرنې د پراختیا صندوق د چارواکو په شتون کې په لاره اچول شوې وه.

د کرنې د پراختیا د صندوق تخنیکي ټیم، یادې کمېټې ته د پور اووه غوښتنې ور وپېژندلې او د کمېټې غړو ته د پور غوښتونکو د فعالیتونو په هکله بشپړ معلومات ور کړل.

د کرنې د پراختیا صندوق اجراییي رییس ډاکټر ایمل ارمان، چې د دې پور ورکوونکی دی، وایي، چې په دې سختو شرایطو کې یې بزګران نه دی هېر کړي او دې ته ژمن دی، چې د دوی د اړتیا وړ پورونه په خپل وخت د دوی په واک کې ورکړي په ځانګړې توګه د بامیانو د کوپراټیفونو یو زر او ۵۰۰ غړو ته چې هر کال دغو پورونو ته سترګې پر لار وي.

د کرنې، اوبولګولو او مالدارۍ وزارت تر چتر لاندې یاد صندوق د کویډ-۱۹ یا کرونا ناروغۍ له خپراوي څخه د مخنیوي په پار د ګرځبندیز سره سره د کرنې د ودې او پراختیا په پار له هېڅ ډول هڅې نه دي په شا شوي او هلې ځلې کوي، چې د امکان تر کچه په روان فصل کې د کرنې بنسټ پیاوړی شي.

د کرنې د پراختیا صندوق یو مالي دولتي غیر بانکي بنسټ دی، چې د کرنې، اوبولګولو او مالدارۍ وزارت تر چتر لاندې فعالیت کوي.

د افغانستان د کرنې د ودې او ښه کولو په موخه د مالي منځکړیتوبونو او پور ورکولو له لارې سوداګریزو بزګرانو او سوداګرو ته پورونه ورکول د دې صندوق عمده دندې دي.

یاد صندوق د خپل تأسیس له پیل څخه تر دې دمه بزګرانو ته ۱۰,۸ میلیارده افغانۍ پورونه ورکړي او دغه راز کرنیزو سوداګرو، کوپراټیفونو، د کرنې او مالدارۍ ټولنو، مالي منځګړیو، د غوا ساتنې، کب روزنې او چرګانو روزنې فارمونو، د وچ او تازه مېوو صادروونکو او پروسس کوونکو، د اوړو د تولید فابریکو، د کرنیزو توکو د تولید شرکتونو، مغازو او د کیمیاوي سرو واردوونکو او د کرنې برخې پر سوداګرو ۸,۴ میلیارده افغانۍ وېشلي دي.

له دغو چوپړونو څخه په ۳۲ ولایتونو کې ۴۷زره او ۸۹۲ بزګران په مستقیم ډول برخمن شوي دي.

دمګړۍ د کرنې د پراختیا صندوق د افغانستان د کرنې د سکټور د تمویل مخکښه مرجع بلل کیږي، چې مرکزي دفتر یې په کابل کې دی او په بلخ، هرات، کندهار او ننګرهار کې هم سیمه اییز دفترونه لري.

د یادونې وړ ده چې د کرنې د پراختیا صندوق بودجه نړیوال پراختیایي ادارې «USAID» له خوا ورکول کیږي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More