ښه خبر؛ ژر به د سولې خبرې بېرته پيل شي

خبریال وېبپاڼه/  که څه هم د سولې خبرو درېدو او د جګړې شدت افغانان سخت اندېښمن کړي دي او په یو ډول خپل برخلیک تیاره ویني، خو اوس بیا تازه هیلې پيدا شوې دي، چې ښايي بېرته خبرې پیل شي.

تازه د ملي مصالحې عالي شورا رییس ډاکټر عبدالله عبدالله په یوه ټوېټ پیغام کې ویلي چې د افغان حکومت له مذاکراتي پلاوي سره یې کتلي او پر بېلو مهمو مسایلو خبرې شوې دي.

دده په وینا په دې لیدنه کې د هېواد پر روان وضعیت بحثونه شوي دي او ټینګار شوی چې افغان جګړه باید د خبرو له لارې ختمه کړل شي.

د ډاکټر عبدالله عبدالله په خبره افغان حکومت ددې ملاتړی دی چې روانه جګړه د خبرو له لارې ختمه شي او ټول تمرکز پر مذاکراتو دی.

هغه زیاته کړې چې د افغان حکومت مذاکراتي پلاوی به ژر بېرته دوحې ته ستون شي او هلته په ټپه ولاړ مذاکرات به بیا ځلې پيل کېږي، څو ژر یوې نتیجې ته ورسېږي.

د سولې خبرو پيل ښه خبر دی، خو تر دې مهمه لا دا ده چې د سولې په اړه د برخلیک ټاکونکې پرېکړې (استانبول غونډې) سرنوشت مالوم شي او دواړه لوري پکې ګډون وکړي، ځکه د سولې خبرې تر دې وړاندې هم په دوحه ې روانې وې، مګر چندان نتیجه یې مالومه نه ده او باید چې د ترکیې غونډې له لارې د خبرو برخلیک مالوم شي.

دلته بیا هره ورځ جګړه شدت اخلي او د ورځې لسګونه عام افغانان او امنیتي ځواکونه شهیدانېږي، چې دغه وضعیت عام افغانان سخت اندېښمن کړي دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More