fbpx

راشد خان: ما د خپل ژوند تکيه له لاسه ورکړه

د افغانستان د ملي لوبډلې مخکښ ورو توپ اچوونکي راشد خان پلار له دې نړۍ څخه سترګې پټې کړي دي. ويل کېږي چې هغه ناروغ و او په پېښور کې يې خپل ژوند له لاسه ورکړى دى، چې نن ورځ خاورو ته هم سپارل شوى دى.

راشد خان په بيګ باش ليګ کې لوبېږي نو له هغه ځايه به د خپل پلار جنازې ته نه وي رارسېدلى، خو په خپله رسمي فېسبوکپاڼه يې د غم يو خبر خپور کړى دى، چې نه يوازې دا چې د هغه دروند غم ترې څرګندېږي، بلکې خپل ټول مينه وال هم يې خپه کړي.

راشد خان په خپل پوسټ کې ويلي دي، چې د خپل ژوند تکيه يې له لاسه ورکړې ده. هغه زياتوي چې پلار به ورته تل ويل چې ثابت، هوډمن او غښتلى اوسه. هغه وايي چې د پلار غم يې ډېر دروند دى او له خداى پاک څخه يې د صبر غوښتنه کړې ده.

راشد خان ليکلي:

((رب زما له سر نه زما د پلار سیوری واخیست. ما نن د خپل ژوند تکیه له لاسه ورکړه. پلار جان به تل راته ویل چې په ژوند کې ثابت، هو‌‌‌‌‌‌ډمن او غښتلی واوسه. پلار جانه، رب دې د جنتونو سردار کړه، غم دې دروند دی. ربه، صبر راکړې.))

راشد خان دوى ټول ٧ وروڼه دي، چې تر ټولو کشر يې راشد خان دى. نوموړى د نړۍ يو له لويو توپ اچوونکو څخه دى، چې نه يوازې په شل اوريزو، بلکې په يو ورځنيو لوبو کې يې هم لومړى مقام ترلاسه کړى دى، اوس مهال نوموړى د الراونډر په حېث هم خپل نوم پېدا کړى دى.

ښاغلى راشد خان چون اوس مهال په آسټراليا کې دى، نو يې ونه شو کولاى چې د خپل پلار په جنازه کې ګډون وکړي. د نوموړي د پلار په مړينه باندې د کرکټ بورډ ادارې او ټولو ملي لوبغاړو سربېره، د کرکټ مينه والو هم ژوره خواشيني څرګنده کړې ده.