عبدالله وايي، طالبان د جګړې له لارې واک ته د رسېدو په فکر کې دي

خبریال وېبپاڼه/ سره له دې چې د قطر په پلازمینه دوحه کې د سولې مذاکراتي ټیمونه ناست دي او دې ته په تمه دي چې خبرې بیا پیل کړي، د ملي مصالحې عالي شورا مشر ډاکټر عبدالله عبدالله ویلي دي چې طالبانو د خبرو له لارې د روانې لانجې حل نه غواړي. 

عبدالله ویلي، چې طالبان د سولې په برخه کې سیاسي حل‌لارې ته لېوالتیا نه لري او په خبره یې چې دا ډله د پوځي پرمختګ سوچونه کوي، څو د جګړې له لارې واک ته ورسېږي.

عبدالله پرون له اسوشیټېډ پرېس خبري آژانس سره په مرکه کې وویل، چې طالبان د بهرنیو ځواکونو وتل د خپل پوځي پرمختګ لپاره ګټور بولي او د خبرو له لارې سولې ته د رسېدو په برخه کې یې هڅې کمزورې کړې دي.

د عبدالله په خبره، چې طالبانو ته ممکن ځان پیاوړی ښکاري، خو په وینا یې چې د دوی دا ډول محاسبه غلطه ده او په هېڅ صورت بریا ته نه شي رسېدای.

عبدالله په خپلو خبرو کې د افغان سولې په تړاو د ترکیې غونډه ته په اشارې هم ویلي، چې دا ناسته به هغه وخت کېږي، چې دواړه لوري د سولې خبرو ته جدیت ښکاره کړي.

بلخوا طالبان دا ادعاوې ردوي او زیاتوي چې دوی د سولې په برخه کې تر پوځي لارو مذاکراتو ته ژمن دي.

د دې ډلې د قطر د دفتر ویاند محمد نعیم تېره شپه رسنیو ته ویلي، چې دوی د پوځي لارو پرځای همېشه پر مذاکراتو ټینګار کړی او پر دولت یې تور پورې کړی چې له اختر وروسته د افغان دولت پلاوي د خبرو لپاره تیار نه دي.

دا په داسې حال کې ده، چې له افغانستانه د بهرنیو ځواکونو د وتلو بهیر پیل شوی او ورسره هممهاله په هېواد کې د تاوتریخوالي کچه لوړه شوې ده چې عام افغانان یې سخت ناهیلي کړي دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More