fbpx

پانډيا او راهول له هندۍ لوبډلې بهر شول

د هندي لوبډلې دوه مخکښ لوبغاړي هاردک پانډيا او کى ايل راهول، د آسټراليا پر وړاندې د يوې ورځنۍ لوبې له سکواډ څخه وويستل شول. د دواړو د ويستلو لامل دا و چې په يوه خپرونه کې يې د ښځو په اړه غلطې تبصرې کړې وې.

د هندي رسنيو د راپورونو تر مخه، دواړه له لوبډلې ويستل شوي دي او د آسټراليا پر وړاندې په لوبه کې په نه لوبېږي، له آسټراليا سره د هند يادې لوبې د شنبې له ورځې پيلېږي.

هاردک پانډيا او کى ايل راهول د يو هندي ټلويزيون مشهورې خپرونې (کافي ود کرن) د ښځو په اړه غلطې تبصرې کړې وې، چې وروسته پر دواړو سختې نيوکې وشوې او همدا راز د هند کرکټ بورډ هم د دواړو پر دغه کار ګام پورته کړ او د اخطار تر څنګ يې دواړه له لوبډلې وويستل.

دواړه به د شنبې له ورځې په سډني کې د آسټراليا پر وړاندې د هند په سکواډ کې نه وي. د هند کرکټ بورډ يو مسوول ونود راى له رسنيو سره په خبرو کې ويلي دي، چې تر څو د دواړو په اړه بشپړه څېړنه ونه شي، دواړه به له لوبډلې څخه بهر وي.

هغه همدا راز رسنيو ته ويلي دي، چې د تر دې پورې دا نه ده ټاکل شوې چې د دوى په اړه به څوک پلټنې وکړي، خو وايي چې دواړه به تر هغې له لوبډلې بهر وي چې پلټنې ترې وشي او د دې کړنې په اړه ترې ځواب وغوښتل شي.

(کافي ود کرن) په هند کې يوه مشهوره خپرونه ده، چې کرن جوهر يې له څو کلونو راهيسې کوربه دى. په دغه خپرونه کې په ځانګړې توګه فلمي ستوري مېلمانه کېږي، خو ځينې ځينې وخت پکې يو نيم لوبغاړى هم مېلمه شي. هاردک پانډيا او کى ايل راهول هم په لومړي ځل په دغه خپرونه کې مېلمانه شوي ول.