fbpx

سويټزرلېنډ کې يو ځوان د (الله اکبر) په ويلوجريمه شو

په سويټزرلېنډ کې هغه مهال يو مسلمان ځوان خوا و شا ١٥ زره افغانۍ جريمه شو، چې خپل يو ملګرى يې ډېره موده وروسته وليد او (الله اکبر) يې وويل، پوليسو هغه ٢١٠ سويس فرانک جريمه کړ.

د نړيوالو رسنيو د راپورونو تر مخه، ٢٢ کلن مسلمان ځوان آرحان د سويټزرلېنډ د شف هاون ښار اوسېدونکى دى، نوموړي ناڅاپه خپل يو نږدې ملګرى ډېر کلونه وروسته وليدل، نو يې له حېرانۍ څخه د الله اکبر نعره ووهله، چې پوليسو د ترهګريز بريد له ويرې جريمه کړ، دا پېښه تېر کال د مۍ په مياشت کې راغلې وه.

آرحان په خپلو خبرو کې وويل، چې په همدې ښار کې زېږېدلى او مخکې هېڅکله له داسې کومې پېښې سره نه دى مخ شوى. هغه وايي چې هغه مهال ترې پوليس چاپېر او وسلې يې پرې راتاو کړې، چې يې د خپل ملګري په ليدو (الله اکبر) وويل.

هغه وايي، پوليس افسر رانه پوښتنه وکړه چې د دې لفظونو مطلب څه دى، چې بيا ما هغه په دې وپوهاوه چې د دې مطلب چاته زيان نه دي رسول، بلکې کله چې موږ له چا سره وينو نو هغه مهال دا وايو او هر وخت موږ دا په خپلو خبرو کې وايو. خو پوليسو هغه ته اخطار ورکړ چې که يې جريمه ادا نه کړه، نو به يې زندان ته ولېږي. پوليسو هغه ١٥٠ سويس فرانک جريمه کړ او بيا يې ٦٠ سويس فرانک نور هم ورسره کړل او ورته يې وويل چې ٢١٠ سويس فرانک دې جمع کړي. ٢١٠ سويس فرانک خوا و شا ١٦ زره افغانۍ کېږي.

پوليسو د خپل دې کار په دفاع کې وويل، چې دا لفظونه په خلکو کې ويره خپرولى شي، نو په داسې وخت کې پوليسو هماغه څه وکړل، چې څنګه ورته ښه ښکاره شول او څنګه بايد په دغه حالت کې ترسره شوي واى.

د پوليسو وياند وويل، په داسې وخت کې کېداى شواى چې خلکو کې ويره خپره شوې واى، ځکه نو پوليسو د دې هر څه پلټنه وکړه او دغه ځوان يې جريمه کړ، ځکه په وروستيو کې چې کومې ترهګريزې پېښې شوي دي، نو همداسې لفظونه پکې ويل شوي دي. يو بل پوليس هم رسنيو ته ويلي، چې د دغه ځوان انداز داسې و چې موږ مجبوره شو جريمه يې کړو.