fbpx

مشرانو جرګه: د سولې پروسه حساس پړاو ته رسېدلې باید دقت وشي

د مشرانو جرګې یو شمېر غړي او رییس وایي، د افغان سولې روانه پروسه چې د امریکا او د سیمې د ځینو هېوادونو له خوا پر مخ وړل کېږي، هر ډول خبرې او پرمختګونه یې باید له افغان حکومت او خلکو نه پټ نه وي.

 دوی د نن ورځې په عمومي جلسه کې د خبرو پر مهال وویل، د افغان سولې پروسه یو حساس پړاو ته رسېدلې، که دقت پکې ونه شي او دغه راز د افغانستان ګټې او ارزښتونه په کې په پام کې ونه نیول شي، هېواد به له یو بل ناورین سره مخ کړي. د مشرانو جرګې رییس فضلهادي مسلمیار په دې اړه د جرګې د یو شمېر غړو له بحثونو وروسته وویل، پیغام یې ښکېلو هېوادونو ته دا دی چې د افغان سولې برخه کې یې هر راز هڅې باید افغانانو ته ښکاره وي. د یادې جرګې غړو نیوکه وکړه چې د سیمې هېوادونو په دې اړه خبرې پیل کړې خو له افغانانو نه پټې دي چې د دوی په باور دا کار د هېواد په زیان دی.

سناتورانو په دې برخه کې له ټولو هڅو ملاتړ کړی او غوښتنه یې کړې چې دا هڅې باید ښکاره او له افغان حکومت سره په همغږۍ وي.