fbpx

افغان بوکسر سهېل احمد سره د خبريال مرکه

افغان بوکسر يا د سوکوهنې لوبغاړى سهېل احمد چې تېره ورځ له انګلستان څخه کابل ته راغلى دى، نن ورسره خبريال په خپله فېسبوکپاڼې په ژوندۍ بڼه مرکه وکړه او د هغه د ژوند په اړه، د هغه د تېرو مسابقو او د راروانو پلانونو په اړه ورسره وغږېدو.

سهېل احمد مغلزى د ننګرهار ولايت د روداتو ولسوالۍ اوسېدونکى دى، چې ١٨ کاله مخکې، کله چې دى ١٢ کلن و، برېتانيه ته تللى دى، په برېتانيه کې يې زده کړې هم کړي او هلته يې د سوکوهنې لوبه هم زده کړې ده، چې تر دې مهاله پورې يې ١٤ مسابقې ترسره کړي، چې يوه يې بايللې او ١٣ کې يې بريا ترلاسه کړې ده.

نوموړى همدا راز خپله پنځلسمه مسابقه هم په لندن کې لري، خو د دغه مسابقې د تمرين لپاره خپل هېواد ته راستون شوى دى او غواړي چې په کابل کې تمرين وکړي او بېرته يادې مسابقې ته لندن ته لاړ شي.

هغه وايي، چې له خپل هېواد سره ډېره مينه لري او په همدې خاطر يې وغوښتل چې د تمرين لپاره دلته راشي. هغه وايي چې اوس به له خپلو لوبو مخکې حتمي افغانستان ته راځي او خپل تمرينات به همدلته ترسره کوي.

کولاى شئ چې د سهېل احمد مغلزي بشپړه مرکه لاندې وګورئ.