fbpx

پاکستان کې ٤ ميليونه کسان بېکاره دي

په افغانستان کې هم ورځ تر بلې بېکاري په زياتېدو ده، خو که له پاکستان خبر شئ، نو خپل ځان به بختور وګڼئ. په پاکستان کې په يوې تازه سروې کې ويل شوي دي، چې په دغه هېواد کې څه کم ٤ ميليونه کسان اوسمهال بېکاره دي او دا کچه هره ورځ زياتېږي، چې تر ٢٠٢٠ کال پورې به ٨.٦ ميليون ته ورسېږي.

د پاکستان حکومت د بېکارۍ په اړه د ٢٠١٧ او ٢٠١٨ کال سروې خپره کړې ده، چې په دغه سروې کې ويل شوي دي چې د بېکاره خلکو په شمېر کې ١٧٠ زره کسان زيات نور هم زيات شوي دي، چې دې سره د بېکاره کسانو شمېر ٣٧ لکه او ٩٠ زره ته رسېدلى، يعنې څه کم ٤ ميليونه کسان اوس مهال په پاکستان کې بېکاره دي.

د پاکستاني رسنيو د راپورونو تر مخه، په پاکستان کې په ٢٠١٥ کال کې ٣ ميليونه او ٦٢٠ زره کسان بېکاره و، په پنجاب ايالت کې ٢٣ لکه او ٩٠ زره او په سند ايالت کې ٧ لکه او ٥٠ زره کسان بېکاره دي.

د دغه سروې تر مخه، په خېبر پښتونخوا کې ٥ لکه او ٥٠ زره او همدا راز په بلوچستان ايالت کې ١ لک او ١٠ زره کسان بېکاره دي. همدا راز دا هم ويل شوي دي چې په پاکستان کې په واده شوو او کونډو ښځو په شمېر کې هم ډېر زياتوالى راغلى دى.

په راپور کې ويل شوي دي، چې د واده شوو کسانو شمېر له ٥٢.٦ سلنې څخه ٥٣.٥ ته پورته شوى دى او د کونډو شمېر بيا له ٣.٦ څخه ٣.٩ سلنې ته لوړ شوى دى.

همدا راز د پاکستان ټوډى ويبپاڼه په خپل يو راپور کې ليکي، چې اوس مهال په پاکستان کې ٤ ميليونه کسان بېکاره دي، چې عمرونه يې له ١٥ څخه تر ٢٤ کلونو پورې دي. وېبپاڼه زياتوي، چې تر ٢٠٢٠ کال پورې به په پاکستان کې د بېکاره کسانو شمېر تر ٨.٦ ميليونو څخه هم واوړي.

پاکستاني رسنۍ وايي، چې د بېکارۍ د کچې زياتېدو سره حکومت او ولس دواړه اندېښمن دي، خو حکومت هېڅ لار نه لري چې په هېواد کې د بېکارۍ کچه راټيټه کړي. ويل کېږي چې په پاکستان کې د عمران خان د حکومت راتلو سره سم، هغه ولس سره ژمنه کړې وه، چې خلکو ته به کار پېدا کړي، خو اوس هغه په خپله ژمنه کې هم پاتې راغلى دى.