ایران د طالبانو سره د اوبو د مسلې راپور خپور کړ

خبريال وېبپاڼه: د ایران د دولتي تلويزيون پرېس وي وي د خبر په بنسټ طالب چارواکو ددې هېواد استازو ته ډاډ ورکړی دی چې د اوبو د مسلې په هکله به د ايران سره کومه ستونزه ونلري.

د ياد شوي تلويزيون د خبر په بنسټ طالبان دې ته ژمن دي چې د اوبو د مسلې د حل لپاره د ياد لوري سره خبرې وکړي، خيرالله خيرخواه د طالبانو په استازيتوب دې رسنۍ ته ويلي دي چې د اوبو په برخه کې به د ايران سره کومه ستونزه ونلري او که کومه ستونزه موجوده وي هم نو نړيوال قوانين شتون لري د هغه په بنسټ به حل شي.

د خيرالله خيرخواه په خبره چې ځينې توافقنامې موجودې دي د ايران سره چې د ستونزې په مهال هغه ته هم مراجعه کېدی شي، خو خیرخواه زياتوي که د نیت خبره ستونزه ونلري او د ټولو نیت ښه وي نو د اوبو په مسله کې به هېڅ ډول ستونزه رامنځته نشي.

د طالبانو د دوحې د سياسي دفتر دا غړی په داسې حال کې ايران ته د اوبو د مسلې په هکله کلک ډاډ ورکوي چې په افغانستان کې د موجود حکومت او ايراني لوري ترمنځ د اوبو مسله په يوه جنجالي مسله بدله شوې ده.

ايران د افغانستان په غرب کې د جوړېدونکې بندونه مخالفت کوي او حکومت یې ان تېر ځل ګواښ وکړ چې که د بندونو جوړول د افغانستان په غرب کې دوام وکړي نو دوی به د بلې لارې څخه هم ددې مخنیوي په برخه کې لاس ونه نيسي.

په دې وروستيو کې د هېواد په غرب کې په ګڼو بندونو د بېلابېلو وسله والو له لوري بریدونه شوي دي چې ګڼ شمېر بند ساتونکو پکې خپل ژوند له لاسه ورکړی دی.

د چارو ځینې څارونکي اندېښنه ښيي چې د ايران او طالبانو ترمنځ نږدې والی بې څه نه دی او کېدی شي چې طالبانو په دې اړوند ايران ته غوړې وعدې ورکړې وي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More