ارغندیوال په کابل کې د نړیوال بانک له رییس سره وکتل

خبریال وېب پاڼه/د مالیې وزیر په افغانستان کې د نړیوال بانګ له رییس سره په کتنه کې د کرونا ضد مبارزې ته د نړیوال بانک له مرستو مننه کړې ده.

په افغانستان کې د نړیوال بانک رییس هنري کرالي د مالیې له وزیر سره په خپلو څرګندونو کې د نورو مرستو ژمنه هم کړې ده او ویلي یې دي چې نړیوال بانک به په افغانستان کې د ځینو نورو پروژو پیسې هم د کرونا ضد مبارزې ته ورکړي ځکه په وینا یې اوس مهال افغانستان تر بل هر زیات د کرونا له ستر ګواښ سره مخ دی.

هېنري داسې مهال د نورو مرستو خبره کوي چې دوه ورځې وړاندې د نړیوال بانک لومړۍ جوپه مرسته چې شل ملیونه ډالره وو، د افغان حکومت خزانې ته جمعه کړل. دوی ژمنه کړې وه چې پاتې څه د پاسه ۸۰ ملیونه ډالر به هم په نیږدې راتلونکي کې افغانستان ته وسپاري.

د روانې اپریل میاشتې په ۱۴ مه نېټه د پیسو نړیوال صندوق هم اعلان وکړ چې د افغانستان په ګډون به ۲۵ هېوادونو ته پور ورکوي. د پیسو نړیوال صندوق د کرونا له مبارزې سره د افغانستان په ګډون له ذکر شویو هېوادونو سره د ۵۰۰ ملیونه ډالرو مرسته ځانګړې کړې وه، چې یادو شویو هېوادونو ته به یې پور ورکوي. جاپان او بریتانیا د دغو مرستو لوی تمویلوونکي هېوادونه بلل شوي دي.

مخکې ایران هم د پیسو له نړیوال صندوق څخه د پور غوښتنه کړې وه خو د امریکا د فشارونو له امله د پیسو نړیوال صندوق ایران ته د پور له ورکړې انکار وکړ. ایران د آسیا په کچه د کرونا له امله د ډېرو قربانیانو شاهد دی چې تر ۵ زرو ډېر کسان یې د کرونا له امله وژل شوي دي.

په افغانستان کې د نړیوال بانک رییس وایي چې په افغانستان کې د کرونا پر وړاندې مبارزه تر بل هر څه اړین ګام دی او زیاتوي چې نړیوال بانک چمتو دی په دې برخه کې خپلو مرستو ته دوام ورکړي.

ښاغلي هینري او د مالیې وزیر داسې مهال د مرستو پر دوام او زیاتېدو خبرې کوي چې په افغانستان کې د کرونا مثبتې پېښې شاوخوا ۱۱۰۰ کسانو ته رسېږي. په دې کې ۱۱۰ تنه روغتیا پالان هم شامل دي او تر شلو زیات د چارو اداې کار کوونکي هم ورسره دي.

په ورته وخت کې د هېواد په ډېری لابراتوارونو کې د کرونا د تشخیص د کېټونو د کمښت راپورونه هم ورکړل شوي دي چې دې چارې د خلکو اندېښې لا پسې زیاتې کړې دي.

هنري وایي چې افغانستان ته د سل ملیونه ډالرو په ورکړې چې تدارکاتي چارې به یې آسانه شي او د ځینو نورو پروژو پیسې به هم د کرونا ضد مبارزې ته ورکړي. تر دې د مخه حکومت هم د ځینو نورو پروژو پاتې شوې پیسې د کرونا پر وړاندې مبازې ته ځانګړې کړې وې.