تېرو ۲۴ ساعتونو کې ۵۱ تاره پېښې ثبت شوې

خبریال وېب پاڼه/د عامې روغتیا وزارت د معلوماتو له مخې په تېرو ۲۴ ساعتونو کې په ټول هېواد کې د کرونا ۵۱ تازه مثبتې پېښې ثبت شوې دي.

د دغه وزارت ویاند وحید مایار په خپل تازه بیان کې وایي چې په تېره شپه او ورځ کې په هېواد کې د کرونا ویروس ۵۱ تازه مثبتې پېښې ثبت شوې دي چې دې سره په هېواد کې د مجموعي پېښو شمېر ۱۱۴۳ کسانو ته لوړ شو.

په دغو تازه مثبتو پېښو کې ۲۸ له کابل، ۳ په هرات، ۲ په غزني، ۴ په کاپیسا، ۶ په ننګرهار، ۳ په کنړ، یوه یوه بیا په بامیانو، پروان، لغمان، پکتیا او فراه ولایتونو کې ثبت شوې دي.

په دې وروستیو کې کابل د کرونا مثبتو پېښو له مله زیات اغېزمن شوی دی چې هره ورځ په کې تر ۲۰ او ۳۰ زیاتې پېښې ثبت کېږي. کابل یو ګڼ توکمی ښار دی چې د اټکل له مخې پبه کې شاوخوا ۶ تر ۷ ملیونه وګړي په کې اوسېږي.

په ورته وخت کې د هېواد ختیځ زون هم د کرونا له امله په دې وروستیو کې زیات اغېزمن شوی دی.

کرونا اوس په یو نړیوال ناورین بدله شوې ده چې د نړۍ په هر ګوټ کې یې پښې خښې کړې دي او په هر هېواد کې یې لسګونه، سلګونه او زرګونه کسان وژلي دي. په ټوله نړۍ کې تر دې دمه په ټوله نړۍ کې تر دوه نیمو ملیونه زیات کسان په دغه وبا اخته دي او تر ۱۷۰ زرو زیات کسان یې وژلي دي.

امریکا په ټوله نړۍ کې د کرونا له امله زیاته زیانمنه شوې ده. په دغه هېواد کې تر اوسه پورې تر ۸۰۰ زرو  زیات کسان په کویډاـ۱۹ ناروغۍ اخته شوي دي او تر ۴۵ زرو زیات کسانو یې د کرونا له امله ژوند هم له لاسه ورکړی دی.

هخوا په اروپایي هېوادونو کې د کرونا له امله د وژل شویو کسانو تر ۱۱۰ زرو اوړي چې لویه برخه قرباني یې د ایټالیا او اسپانیا څخه اخیستې ده. په ایټالیا کې د کرونا له امله تر ۲۴ زرو زیات کسان وژل شوي دي او په دغه ویروس ککړ کسان بیا تر شاوخوا ۱۹۰ دي. په اسپانیا کې هم د مړو شمېر تر ۲۰ زرو اوړي او په کرونا د اخته کسانو شمېر یې تر ۲ لکو زیات دی.

په آسیایي کچه له ایران او چین وروسته ترکیه د کرونا تر سخت برید لاندې ده چې تېره ورځ یې ولسمشر په دغه هېواد کې پر تګ راتګ هم کلک بندیز ولګاوه.

په افغانستان کې د کرونا له امله ۴۴ کسان وژل شوي دي او تر ۱۵۰ زیات ورڅخه بېرته رغېدلي هم دي.