ترکیه کې د تا، لب چارواکو سره څلور مهمې بې نزاکتۍ ترسره شوې

خبريال وېبپاڼه: د افغانستان د نوي حکومت د بهرنیو چارو وزیر او ورسره ټيم یې د دوحې څخه انقرې ته ولاړ او تېره ورځ یې په دې هېواد کې د ترکیې د بهرنیو چارو له وزير سره وکتل او نن یې بيا د ترکیې د ديانت له وزير سره يو لړ ليدنې درلودې.

که څه هم ټولنيزو رسنيو کې د نوي حکومت پلويانو چې تازه تازه بهرنیو هېوادونو ته د حکومت د استازو او چارواکو په صفت د خپلو مشرانو سفر ګوري خوشحاله و او دا یې ډېر لوی کار ګاڼه په حقيقت کې دا سفر د پرلپسې بې نزاکتيو څخه ډک و، کله چې د نوي حکومت مشران ترکیې ته ولاړل نو په هوايي ډګر کې چې کله د الوتکې څخه ښکته کېږي هېڅ ډول تدابیر نه و نیول شوي، دوی سره وروسته له هغه ډېرو ټیټ رتبه ترکي چارواکو روغبړ وکړ کله چې دوی د هوايي ډګر د ترمينل له وي ای پي دروازې بهر کېدل، له دې پرته کله چې د دواړو لوریو ترمنځ لیدنه وشوه نو د لیدنې وروسته په خبري غونډه کې هېڅ افغان لوري ته ځای ورنکړل شو صرف د ترکيې د بهرنیو چارو وزیر خبرې وکړې او د خبريالانو پوښتنې یې ځواب کړې.

د ترکیې رسمي دولتي خبري سرچينو او وياندويانو د افغان لوري د سفر په هکله هیڅ کوم خبر خپور نکړ، مثال د ترکیې د بهرنیو چارو وزیر په ټويټر کې ډېر فعال دی، ډېره عادي ليدنه هم د انځورونو سره خپروي، خو د افغان حکومت له چارواکو سره نه یوازې چې د هغه له حساب څخه کوم انځور خپور نشو بلکې يادونه يې هم ونشوه، ورسره د ترکیې د بهرنیو چارو د وزارت کوم ویاند هم په دې هکله هیڅ کوم خبر يا انځور خپور نکړ. د ترکیې حکومت همغه خبرې چې غربي هېوادونه یې کوي نوي افغان حکومت ته تکرار کړې او ويې ويل چې موجود افغان کډوال بايد خپل ملک ته ستانه شي‌.