fbpx

په سنګین ولسوالۍ کې د ولسي وګړو وژل کېدل

ځانګړو ځواکونو د هلمند په سنګین ولسوالۍ کې شل ملکیان وژلي دي. دا ادعاوې په مشرانو جرګه کې د هلمند د خلکو یو استازي کړي دي. کندهار کې بیا ځایي چارواکي وایي نن شنبه سهار وختي د هلمند په سنګین ولسوالۍ کې د افغان ځانګړو ځواکونو له لورې په عملیاتو کې پنځه لس مخالفین وژل  او لس تنه ژوندي نیول شوي دي.

خو د هلمند د سنګین ولسوالۍ اوسیدونکي او په مشرانو جرګه کې د هلمند استازی وایي وژل شوي ملکي کسان دي.

د کندهار ولایت مقام د رسنیو دفتر وایي یاد عملیات د استخباراتي معلوماتو پر اساس ترسره شوي دي. چې په ترڅ کې یې د طالبانو اداري مرکز او څلور کورورنه هم ویجاړ شوي دي. خو د هلمند ځایي چارواکي د عملیاتو په اړه ناخبري ښيي.

طالبان بیا د هلمند په سنګین ولسوالۍ کې د کورنیو او بهرنیو ځواکونو د عملیاتو په ترڅ کې د یوولسو ملکي وګړو د وژل کېدو او د پنځه لس ټپیانو چې په کې ښځې او ماشومان هم شامل دي خبر ورکوي.

بل لور ته چارواکي د کندهار د ارغستان په وام دره کې د پنځه ویشت وسلوالو د وژل کېدو خبره کوي. د کندهار امنیه قوماندان تادین خان وایي یاد عملیات د کندهار  ارغستان او معروف تر منځ غځېدلې تړل شوې لارې د خلاصون په موخه ترسره شوي دي.

قاري یوسف احمدي د وسلوالو طالبانو  ویاند د حکومت راپورونه ردوي او پر ځواکونو د برید او هغوی ته د دروند زیان د اړولو ادعا کوي.