fbpx

هند: پاکستان سره دښمني او کرکټ يو ځاى نه شي کېداى

پاکستان له تېرو ډېرو کلونو راهيسې په دې هڅه کې دى، چې له هند سره د کرکټ لوبې برابرې کړي، د پاکستان کرکټ بورډ اوسنى دريم مشر دى، چې په همدې هڅه کې تر دې مهاله پورې ناکامه دى، دوى تل هڅه کوي خو هند ورته په ځواب کې وايي، چې ستاسې سره دښمني او کرکټ يو ځاى نه شي کېداى.

د پاکستان کرکټ بورډ يو غړي وسيم خان د يکشنبې په ورځ له رسنيو سره په خبرو کې ويلي دي، چې موږ بايد هند ته د کرکټ لپاره زارۍ ونه کړو، بلکې پکار دا دي چې موږ خپل ځان داسې يو مقام ته ورسوو، چې هند راته د لوبې لپاره زارۍ وکړي.

دا هم ولولئ: پاکستان ١٥ مياشتنى پښتون ماشوم په ترهګرۍ تورن کړ

همدا راز د هند کرکټ بورډ يو مسوول له يوه هندي ورځپاڼې سره په خبرو کې ويلي دي، چې موږ له پاکستانۍ لوبډلې سره هېڅ مشکل نه لرو، خو اصل مشکل د هند او پاکستان د دښمنۍ دى، تر څو پورې چې پاکستان له ترهګرۍ لاس وانه خلي، د هند او پاکستان دښمني ختمه نه شي او سياسي اړيکې سمې نه شي، تر هغې پورې زموږ د کرکټ لوبې هم نه شي کېداى.

هغه يادې ورځپاڼې ته زياته کړې ده، چې هر کله له پاکستان سره زموږ دښمني ختمه شوه، موږ به د پاکستان د کرکټ لوبډلې سره لوبې هم وکړو، خو تر هغې هېڅ نه شي کېداى.

ياده دې وي چې هند او پاکستان له ډېرو کلونو په کرکټ کې خپل منځي لوبې نه دي کړي، بلکې يوازې په نړيوالو ټورنمنټونو او نړيوال جام کې سره مخامخ شوي دي.

بلخوا تېره ورځ د آسټراليا کرکټ بورډ هم د خپلې لوبډلې پاکستان ته رالېږلو څخه انکار وکړ، پاکستان او آسټراليا يو سيريز لري او پاکستان دا هڅه کوله، چې يو يا هم دوه لوبې به په پاکستان کې ترسره کړي، خو آسټراليا ورته په ځواب کې وويل، چې داسې هېڅ کله نه شي کېداى، چې زموږ لوبډله دې پاکستان ته درشي.