fbpx

عاليه بټ له اوسه د لور لپاره نوم خوښ کړى

د هندي فلمونو نوموتې او ښايستوکې ستورې عاليه بټ ويلي دي، چې د خپلې لور لپاره يې له اوسه نوم خوښ کړى دى. هغې تر دې مهاله پورې واده نه دى کړى، خو د لور نوم يې خوښ کړى دى.

د هندي رسنيو د راپورونو تر مخه، عاليه بټ او رنبير کپور څو څو ځل د خپلې يارانې په اړه خبرې کړې دي. دواړه له يو بل سره مينه لري او له ډېر وخت راهيسې د دوى د واړه په اړه هم خبرونه په رسنيو کې خپرېږي، خو تر دې مهاله پورې دواړو د خپل واده خبره نه ده کړې.

تېره ورځ عاليه بټ د رنوير سنګ سره يو ځاى په برلن فلم فيسټيوال کې ګډون وکړ، چرته چې دواړو د خپل راروان فلم (ګلي بواى) تبليغاتي کمپاين وکړ. همدا راز دواړو د (سپر ډانس) په نوم د نڅا په يوې خپرونه کې هم ګډون وکړ.

د هندي رسنيو د راپورونو تر مخه، د نڅا د خپرونې پر مهال يوې ماشومې له تېروتنې څخه عاليه بټ ته په (الما) نوم غږ وکړ، چې په ځواب کې يې عاليه بټ په خندا وويل، چې (الما) ډېر ښه نوم دى، زما خوښ شو او په خپله لور به همدا نوم ږدم.

ياده دې وي چې څه ورځې مخکې د عاليه او بټ او رنبير کپور د واده په خبرونو باندې عاليه بټ ويلي و، چې خلکو ته پکار دي چې لږ انتظار وکړي، ځکه اوس د دوه ښايسته جوړو ودونه وکړل.

هغه وايي، چې ټولو ته پکار دي چې صبر وکړوي، فلمونه وګوري، د فلمونو په اړه خبرې وکړي او له نورو کارونو سره به وروسته وګوري، چې څه کېږي.

ياده دې وي چې عاليه بټ او رنوير سنګ په راروان فلم (ګلي بواى) کې يو ځاى کار کړى دى. دا فلم به د روا کال د فرورۍ مياشتې په ١٤مه نېټه د هند په ګډون په ټوله نړۍ کې نندارې ته وړاندې شي.