fbpx

مادهوري: ((تېزاب)) فلم مې ژوند بدل کړ

د هندي فلمونو نوموتې ستورې مادهوري ډيکشټ وايي، چې په لومړي سر کې يې ډېرى فلمونه ناکام شول، خو په ١٩٨٨م کال کې يې نندارې ته وړاندې شوى فلم ((تېزاب)) و چې د دې ژوند يې بدل کړ او شهرت يې ترې ترلاسه کړ.

د هندي فلمونو نوموتې ستورې، چې (دهک دهک ګرل) يعنې زړونه لړزونکې نجلۍ، هم ورته کېږي، مادهوري ډيکشټ تېره ورځ د هند په مشهوره خپرونه (کپل شرما شو) کې ګډون وکړ، چرته چې نوموړې وويل چې په لومړي سر کې چې فلمي نړۍ ته راغله، نو په فلم کې به د مرکزي رول پر ځاى د مرستيالې په رول کې اخيستل کېږي او ډېرى فلمونه يې ناکامه هم شول.

مادهوري وايي چې په ١٩٨٨م کال کې يې د ((تېزاب)) په نوم فلم نندارې ته وړاندې شو او دا هغه فلم و چې د دې ژوند يې بدل کړ. هغه وايي، اوس مې هم راته ياد دي، کله چې دا فلم نندارې ته وړاندې شو، نو زما د خور واده و او زه په امريکا کې وم، کله چې هند ته بېرته راغلم، نو له هوايي مېدان څخه چې راووتم، وه مې ليدل چې درې ماشومان زما موټر پاکوي.

دې درې ماشومانو چې زه وليدم، نو په تېزه تېزه يې چيغې کړې چې ((وګورئ ستورې راغله)) او بيا درې واړه ماشومان په منډه زما خوا ته راغلل او له ما څخه يې آټوګراف وغوښتل، ما ورته په يوازې د (اېم) تورى وليکه، نو په دوى کې يو هغه نورو ته وويل، ما نه ويل، چې دا (موهني) ده. دا نو لومړى ځل و چې په ولس کې ما نوم پېدا کړ او خلکو وپېژندم، تر دې مخکې زه چا نه پېژندم.

ياده دې وي چې په ١٩٨٨م کال کې د مادهوري ډيکشټ فلم ((تېزاب)) نندارې ته وړاندې شوى و، چې په دې فلم کې ورسره نوموتي فلمي ستوري انيل کپور کار کړى و او دا فلم هغه مهال خلکو ډېر خوښ کړى و.