عام خلک: تالبان ننګرهار کې د برېښنايي تذکرو د وېش پروسه خنډ سره مخ کوي

خبریال وېب پاڼه: د ننګرهار اوسېدونکي د برېښنايي تذکرو د وېش په پروسه کې د یوشمېر تالب ځواکونو له لاسوهنې شکایت لري.

دوی د خبریال مرکزي څانګې ته په رالېږل شویو پیغامونو کې ویلي، چې یو شمېر تالبان په حوزو کې له وسلو سره ننوځي او د مامورينو د کارونو له خنډ او ځنډ سره مخ کوي.

د ننګرهار يوه اوسېدونکی، د نوم نه خپرولو په شرط خبریال وېب پاڼې ته وویل، چې د برېښنايي تذکرو د وېش له لومړۍ ورځې تر دې دمه په زیات شمېر مامورين نور په ښه زړه له دې امله کار نه کوي، چې له یوه لوري يې د معاش برخلیک نه دی معلوم او بل لورته یې پر دوی حاکم تالبان په یوه او بل نوم ځوروي.

د دې پروسې مراجعین وایي، که تالبان د دوی د کارونو پر وړاندې خنډ ګرځي او کارونه یې ځنډوي نو دا به د دوی لپاره هم ښه تمام نشي.

دوی چې نه یې غوښتل نومونه يې خپاره شي وایي، که چارواکي د دې کار غمه ونکړي نو دوی به یې پر وړاندې پر سوله ییزو لاریونونو لاس پورې کړي.

۷۰ کلن عبدالله کاکا، چې د تذکرې د اخيستو لپاره د جلال اباد ښار ۳ یمې څانګې ته یې مراجعه کړې وایي: « تالبان د خلکو د ځورنو ترڅنګ دلته تجارت شروع کړی، د ننه یې څوکۍ ايښي او هرڅوک چې سکرین والا موبایل راوړي ترې اخلي او د ساتنې به بدل کې ترې په زوره لس افغانۍ اخلي. که پيسې ورنکړي مرکز ته يې نه پرېږدي».

عبدالله کاکا وایي له یوه لوري د تذکرو بیې لوړې شوي او بل لورته دوی هم په یوه او بله پلمه له خلکو پیسې اخلي، چې دا هم د خلکو لپاره یو له ستونزو ډک کار.

هغه زیاتوي که د ننګرهار ولایت او امنیه قومنداني د دې کار مخنیوی ونه کړي نو ښایي ګڼ خلک له دې ملي پروسې لاس واخلي او دې کار ته زړه ښه نه کړي.

په ورته وخت کې بیا په ننګرهارکې د برېښنا يي تذکرو د دوو څانګو یو شمېر مامورينو هم دا ستونزه تائيد کړه.

دوی، چې مستعار نومونه عبدالله او محبت ښيي وایي، دوی د برېښنایي پېژندپاڼو په لومړۍ او درېيمه څانګه کې کار کوي.

دوی زیاتوي، یو شمېر تالبان، چې له مکتوب او پېژندنې پرته  د دوی پر څانګو حاکم شوي هره ورځ بې شمېره دوسیې ورته راوړي څو یې کارونه ور خلاص کړي او که یې کارونه ونکړي نو د وهلو ډبولو او له کاره د ويستلو ګواښ ورته کوي.

یاد مامورین وايي، دوی په تېر حکومت کې د ورځې تر زرو تنو ته کار کاوه خو اوس د تالب ځواکونو د لاسوهنې له امله د ورځې تر ۲۰۰ دوسیې کتلی او کارونه یې خلاصولی شي.

د دوی په خبره د ځان له وېرې اوس لوړپوړو چارواکو ته هم شکایت نشي کولای، ځکه دلته ورته حاکمو تالبانو ګواښونه کړي دي.

هڅه مو وکړه، چې د دې ستونزو په تړاو ولایتي اداره هم وغږوو او نظر یې راواخلو خو له هڅو سره سره بریالي نشو.

د یادونې ده، چې د تالبانو له واکمنېدو ورسته د یادو تذکرو د وېش پروسه ودرېده خو يوه اوونۍ وړاندې په جلال اباد کې دا پروسه بېرته پيل شوه.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More

instagram volgers kopen volgers kopen buy windows 10 pro buy windows 11 pro