اروپايي ټولنه: د افغانستان وضعیت ترینګلی دی؛ باید لاسنیوی وشي

خبریال وېب پاڼه: د تالبانو د حکومت په راتګ سره نه دا چې د خلکو اقتصادي وضعیت ښه شوی نه دی ورځ تر بلې مخ په ځوړي روان دی.

اروپايي ټولنې تازه ویلي، چې  مرستندویه هېوادونه دې له افغانستان سره بشردوستانه مرستې ډېرې کړي.

د یادې ټولنې د بهرني سیاست مسوول جوزف بورل په خپلو تازه څرګندونو کې ویلي، چې  د افغانستان وضعیت ترینګلی دی او زیاتوي، چې دلته په زیات شمېر خلک بشردوستانه مرستو ته اړتیا لري.

جوزف بورل دغه راز  پر نړیوالو مرستندویه بنسټونو غږ کړی، چې د افغانستان د خلکو لاسنیوی وکړي او دوی دې له احتمالي ګواښونو وژغوري.

سرچینې ويلي، چې دوی په خپل وار له افغانستان سره خپلو مرستو ته دوام  ورکوي.

د اروپايي ټولنې د بهرني سیاست مسوول جوزف بورل داسې مهال دا څرګندونې کوي، چې د ناټو غړو هېوادونو دوه ورځنی کنفرانس پیل کړی دی او په هغه کې د افغانستان او اوکراین تر څنګ پر مهمو سیمه ییزو موضوعاتو خبرې کوي.

افغانستان کې د وضعیت ترنګلتيا وروسته له هغه مخ په لوړېدو شوکله ، چې افغانیو خپل ارزښت له لاسه ورکړ او ورسره د خوراکي او سون توکو بیې لوړې شو.

تازه د افغانستان بانک وايي، د افغانیو د ثبات لپاره یې هڅې پيل کړې دي.

د افغانستان بانک مطبوعاتي مسؤل حسیب نوري په یوه وېډيويي کلیپ کې ویلي، چې دوی هڅې پيل کړې چې د ډالر پر وړاندې د افغانیو د راښکته کېدو مخه ډب کړي.

سرچینه وایي په همدې تړاو یې جدي اقدامات پیل کړي او له بېلو اړخونو سره یې لیدنې روانې دي.

په اعلامیه کې راځي چې د افغانستان بانک مشرتابه له صرافانو، سوداګرو او د بانکونو له استازو سره هم خبرې پيل کړې دي، څو وکړی شي روان وضعیت مدیریت کړي.

د افغانستان بانک بیا داسې مهال د تازه اقداماتو خبر ورکوي چې د حکومتي سرچینو په باور ځینې مافیايي کړۍ له وضعیت ناسمه ګټه اخلي او د اسعارو په نرخونو کې لاسوهنه کوي، چې دوی به یې پر وخت پر وړاندې اقدام وکړي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More