وسله والو کسانو غزني کې د يوه خصوصي پوهنتون رئيس شهید کړی

خبریال وېب پاڼه:  د هېواد په مرکز او ولایتونو کې لاهم خلک د مرموزو او هدفي وژنو قرباني دي.

تازه ځايي سرچینو خبریال وېب پاڼې ته ویلي، چې وسله والو کسانو په غزني ولایت کې د سلطان محمود په نوم د یوه خصوصي پوهنتون رئیس شهید کړی دی.

سرچینه وایي شهید کړای شوی شخص ډاکټر معراج وقار نومېږي.

د مالوماتو له مخې ناپېژانده وسله والو یاد کس  ۳ اوونۍ وړاندې تښتولی وو او تېره ورځ ناوخته يې مړی موندل شوی دی.

تالب چارواکي بیا له دې پېښې ناخبره دي او نه هم په دې تړاو خبرې کوي.

د دې پېښې مسوولیت هم تر اوسه چا نه دی منلی او نه یې هم د وژنې لامل څرګند دی.

د مرموزو وژنو لړۍ په داسې مهال دوام لري، چې د چهارشنبې په ورځ د لیندۍ د میاشتې په ۲۴ مه نېټه د بخښنې نړیوال سازمان په ټینګار سره وویل، چې تالو په وروستیو کې د دغه ډول روښانه خلکو د مرموزو وژنو لړۍ چټکه کړې، چې مخنیوی یې باید وشي.

دا پېښه داسې مهال رامنځته کېږي، چې څو ورځې وړاندې د البیروني پوهنتون رئیس هم د تالبانو له ناسم چلند نه شکایت درلود او استعفاء یې وکړه.

نوموړي هم په خپلو خبرو کې په ښکاره ويلي، وو چې د تالبانو له لوري البیروني پوهنتون ته ټاکل شوی استازی دی ګواښي او که پر ده څه وشول مسوول یې تالبان دي.

 

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More