جلال آباد: د تالبانو او انسان تښتوونکو په جګړه کې زرګر هم ووژل شو

خبریال وېب پاڼه: د ننګرهار ولایت په مرکز جلال اباد ښار کې د نن سهار د جګړې تازه حال را څرګند شو.

د دې ولایت د رسنیو دفتر په یوه خبرپاڼه کې په جلال ابادښار کې د یوه تښتول شوي زرګر، ۳ انسان تښتوونکو او یوه تالب سرتېري د وژل کېدو خبر ورکړی دی.

سرچینه وایي، چې د تالبانو د ملي امنیت ځواکونو نن سهار وختي د دغه ولايت د مرکز جلال اباد د لومړۍ ناحيې اړوند قصبې سيمه کې د وسله والو انسان تښتوونکو پر یوه پټن ځای عمليات کړي.

د سرچینې په خبره د عملیاتو پرمهال وسله وال مقاومت شوی او په پایله کې ۳ انسان تښتوونکي وژل شوي او دوه انسان تښتوونکي د شپږ ميله سپکو او درنو وسلو او یو شمېر چاودېدونکو توکو سره ژوندي نيول شوي دي.

د سرچینې په حواله په دې عملیاتو کې یو زرګر چې انسان تښتوونکو له وړاندې تښتولی وو هم وژل شوی دی.

دا چې زرګر د چا په ډزو کې وژل شوی لامعلوم نه دی.

بل لورته بیا تالبان د خپل یوه ملګري د وژل کېدو خبره هم تائيدوي.

دا نښته داسې مهال کېږي، چې په دې وروستیو کې یو ځل بیا په جلال اباد ښار کې هدفي وژنې او د انسان تښتونې پېښې ډېرې شوي.

تېره ورځ هم یو صراف د انسان تښتوونکو له لوري تښتول شوی، چې نن یې په اعتراض کې د جلال اباد ښار صرافانو خپل دوکانونه تړلي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More