کندز کې د یوې کورنۍ ۷ غړي وژل شوي

خبریال وېب پاڼه/ کندز کې د یوې کورنۍ ۷ غړي د شپې له خوا په خپل بستر کې د خوب پر مهال وژل شوي.

د کندز ولایت په امام صاحب ولسوالۍ د یوې کورنۍ ۷ غړي په ډېرې بې رحمۍ سره وژل شوي دي.

د کندز د پولیسو ویاند هجرت الله اکبري ویلي دغه کسان بېګا په نیمه شپه د امام صاحب ولسوالۍ په کنم سیمه کې د شخصي دښمنۍ له امله په ډزو سره وژل شوي دي.

په پېښه کې د دغې کورنۍ د ماشومانو په ګډون څلور نارینه او درې مېرمنې وژل شوي او دوه نارینه غړي یې ټپیان دي.

پولیسو د دغۍ کورنۍ د مشر ورور چې په ګاونډ کې ورسره پروت دی په پېښه کې په لاس لرلو تورن دی، نیولی او پوښتنې ترې روانې دي.

افغانستان کې د کورني تاوتریخوالي او شخصي دښمنۍ له امله داسې زیاتې پېښې رامنځته کیږي.

پرون هم ماسپښين يوه بجه د لغمان ولایت مرکز مهتزلام ښار په شېخانو سيمه کى يو تن خپله مېرمن او خواښې په چريز ټوپک وژلي.

د لغمان د والي وياند اسد الله دولتزى وايي قاتل له سيمې تښتېدلى او د نيولو هڅې يې روانې دي.

د افغانستان په لېرې پرتو سیمو کې د شخصي دښمنیو، کورنیو دښمنیو، کورنیو ستونزو، قومي ستونزو، بې وزلۍ او نورو لاملونو له کبله ورته پېښې زیاتې رامنځته کیږي.

دغه ډول ستونزې او دښمنۍ ډېر کله د ولس او حکومت په همکاریو حلیږي، خو یو شمېر دا ډول ستونزې بیا تر وژنو او یو بل پسې د وسلې تر را اخیستلو رسیږي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More