تالبانو د هوايي ځواک د ور پاتي الوتکو شمېر مالوم کړ

خبريال ويب پاڼه/ تالبانو په افغانستان کې د هوايي ځواک لپاره د الوتکو شمېر اعلان کړ، او زياته يې کړه چې له دې الوتکو څخه کار اخیستل کيږي د راپورونو له مخې تيره ورځ يوه ایم ډي ډوله الوتکه کندهار ولايت کې غورځېدلې چې له ځان سره تلفات هم لري.
د تالبانو د ملکي او پوځي هوايي ډګرونو د تنظيم د‌کميسون مشر لطف الله حکيمي د هوايي ځواک د ور پاتي الوتکو او څرخکو شمېر اعلان کړ.
د تالبانو د هوايي ډګرونو د کميسون مشر وويل چې له تير حکومت څخه دوی ته له ۱۶۴ الوتکو څخه ۸۱ یې ور پاتي دي چې له دې ډلې څخه يې ۴۱ روغې او دوی ترې کار اخلي.
حکيمي دا هم وويل چې د افغانستان ډيری الوتکې بهر دي او د تير حکومت د سقوط په وخت کې بهر ته ليږدول شوې وې.
د نوموړي په خبره چې ۴۱ الوتکې د افغان انجنيرانو له لوري رغول شوې او د نورو په هکله هم ډاډ ورکول شوی چې ډيري ژر به ورغول شي او کار اخستلو ته به چمتو شي.
د تالبانو دې چارواکي وويل چې د تير حکومت د مسؤلینو له لوري د افغانستان الوتکې، تاجکستان ازبکستان متحده عرب امارات او امریکا ته لیږدول شوې چې د بیرته تر لاسه کولو لپاره يې هڅې روانې دي.
په ورته مهال د تير حکومت د ځانګړو ځواکونو د قول اردو مشر جنرال فرید احمدي تالبانو ته په پیغام کې وویل چې دوی بايد پوی شي چې افغانستان ۲۰۰ چورلکې، جنګي او بې پيلوټه الوتکې لري چې دا امانت دي.
د افغانستان هوايي ځواک يو پياوړی او په نويو تجهيزاتو مجهز ځواک وو، چې د حکومت له سقوط سره سم له منځه ولاړی او هرڅه له خاورو سره خاورې شول.