ټي ټي پي او بلوڅ ملتپال به د پاکستان بيخ کاږي
خبريال ويب پاڼه/ د پاکستان اندیښنې ورځ تربلې زياتيږي او په دې هېواد کې د نا امنیو ګراف په لوړيدو دی او پاکستان وارخطا دی.
تازه د پاکستان لومړي وزير عمران خان دوه ورځې وړاندې د پاکستاني لسو عسکرو هلاکيدلو ته غبرګون ښودلی او ويلي يې دي چې زموږ سرتيري قرباني ورکوي ځانونه وژني خو موږ او تاسې ساتي.
عمران خان د بلوڅ ملتپالو هغه خونړي بريد چې پکښې لس پاکستاني عسکر هلاک شول خواشینی کړی او د بلوڅ ملتپالو له لوري دې برید دا وښودله چې هغوی هم د ټي ټي پي غوندي ځواکمن او کولای شي پاکستانی نظام چپه کړي.
د عمراخان وارخطايي د دې ښکارندويي کوي چې پاکستان به يا د ټي ټي پي او بلوڅو غوښتنې که هرڅومره درنې وي مني او يا به هم هره ورځ خپل هلاک عسکر ښخوي.
پاکستان د دې دواړو ډلو ګواښ تر اوسه هومره نه وو بللی لکه چې اوس یې ګواښوونکی حالت رامنځته کړی.
اوس د پاکستان هېواد پر افغان تالبانو هم پوره واک له لاسه ورکړی او تالبان اوس د يوه هېواد ا و دولت دعوا لري.
په يوه بل راپور کې دا هم وويل شول چې د پاکستان او افغان تالبانو اړیکې د پخوا په شان نه دي پاتي او کيدلی شي چې نورې هم خرابې شي.
پاکستان پر ټي ټي پي باندې د فشار او راضي کولو يوازنۍ وسيله همدا افغان تالبان لري.
تيره ورځ د پاکستان د ملي امنيت سلاکار مويد يوسف تور پوري کړ چې اوس هم له افغانستانه دوی ته ګواښ متوجې دی او د دې هېواد څخه په پاکستان کې بريدونه کيږي، د پاکستان دا څرګندونې د دې ښکارندويي کوي چې پر تالبانو اوس د پاکستان هغه پخوانی اعتماد نشته.
بل پلو هره ورځ له ټي ټي پي او بلوڅو رامنځته کيدونکي خطرناک ګواښونو پاکستان نور هم نا هيلی کړی.
په وروستي برید کې د بلوڅ ملتپالو يوې وسلوالې ډلې بلوچ لېبريشن فرنټ يا د بلوڅو ازادي خواه ډلې د بلوچستان ايالت په کچ سيمه کې د پاکستاني عسکرو پر يوې پوستې بريد کې لس پاکستاني عسکر هلاک او درې يې ژوبل کړل