fbpx

ټېسټ سیالي: په لومړۍ ورځ ایرلېنډ ۱۷۲ او افغانستان ۹۰ منډې وکړې

د افغانستان او آیرلینډ ترمنځ د یوازینۍ ټېسټ لوبې لومړۍ ورځ پای ته ورسېده د دې لوبې  په لومړۍ ورځ ایرلینډ لوبډلې لومړی توپ وهنه وکړه دوی په توپ وهنه کې د (۶۰) اورونو په لوبولو سره ټول لوبغاړي په  ( ۱۷۲) منډو له لاسه ورکړ.

د ایرلینډ لپاره په توپ وهنه کې ټیم مرتاغ (۵۴) جوش ډکرېل (۳۹) او پاویل سټرلېنګ (۲۶) تر نورو ډیرې منډې جوړې کړې.

د افغان لوبډلې له لورې په توپ اچونه کې محمد نبي او یامین احمدزي درې درې لوبغاړي وسوځول همداراز وقار سلام خېل او راشد خان دوه دوه لوبغاړي له مخې پورته کړ.

افغان لوبډلې د ورځې په اوږدو کې د دې لوبې دویمه او خپله لومړۍ پاڼۍ هم پیل کړه افغانستان د ( ۱۷۲) منډو په ځواب کې د ورځې د پای ته رسېدو سره سم د دوه لوبغاړو په سوځېدو ټولې (۹۰) منډې جوړې کړي او سبا نهه بجې به یو ځل بیا افغان لوبډله توپ وهنې ته راښکته شي.

د افغانستان لپاره په توپ وهنه کې محمد شهزاد په (۴۰) منډو وسوځېد ،همداراز احسان الله جنت په( ۷) منډو وسوځېد اوس نو رحمت شاه په ( ۲۲) او حشمت شهیدي په (۱۳) منډو ناسوځېدلي ولاړ دي.

د ایرلینډ لپاره په توپ اچونه کې کیمرون توانېدلی چې دوه افغان لوبغاړي له مخې پورته کړي.

افغانستان اوس  (۸۲) منډې د آیرلینډ څخه شاته دی  سبا د لوبې په دوهمه ورځ یوځل بیا افغان توپ وهونکي میدان ته ښکته کېږي.