سېلابونه: لوګر کې یې ښوونځي هم روغ پرېنښودل

لوګر کې د ورښتونو له کبله راوتلیو سېلابونو د ښوونځیو ودانۍ زیانمنې کړي دي.

د طالبانو لوګر ولایت د پوهنې ریاست وایي، د سېلابونو له کبله په مکرز او ولسوالیو کې 24 د ښوونځیو ودانۍ زیانمنې شوي دي.

زیانمن شوي ښوونځي د لوګر مرکز پل علم، خروار، برکي برک، محمد اغې، خوښۍ، ازرې او څرخ ولسوالیو کې دي چې د اوس یې د دولس زره زده کوونکو درسي بهیر ټکنی کړ.

یاد ریاست له نړیوالو بنسټونو د زیانمنو شویو ښوونځیو د بیا رغونې لپاره د مرستو غوښتنه کړې ده.

دا په داسې حال کې ده چې له یوې اوونۍ راهیسې په لوګر کې د سختو ورښتونو له کبله سېلابونه راغلي چې درانه مالي او ځاني زیانونه یې اړولي. دا مهال سېلاب ځپلي هم بېړنیو لومړنیو مرستو ته اړتیا لري.

په ورته مهال د هېواد په ګڼ شمېر ولایوتونو کې د یوې اوونۍ را په دې خوا ورښتونو مالي او ځاني زیانونه اړولي او لا هم د نورو بارانونو اټکل کیږي.

بل خوا د افغانستان ګاونډ پښتونخوا کې د سختو ورښتونو له کبله سېلابونه راوتلي او ګڼ شمېر استوګنځایونه او عامه ځایونه یې نړولي او لسګونه کسان هم په کې مړه یا ورک شوي. دا مهال پاکستاني حکومت په ډېرو سیمو کې بېړنی حالت اعلان کړی.