رینا امیري: لاریونوالو مېرمنو سره د طالبانو تاوتریخوالی د زور نه؛ کمزورۍ نښه ده

د افغانستان د ښځو او بشري حقونو لپاره د امریکا ځانګړې استازې رینا امیري وایي د لاریون کوونکو مېرمنو سره د طالبانو له خوا زور زیاتی د زور نه د کمزورۍ نښه ده.

اغلې امیري په کابل کې د مېرمنو پروني لاریون سره د طالبانو د تاوتریخوالي او زور زیاتي په اړه په ټوېټر لیکلي چې د باور وړ حکومتولي باید د ټولنې د کمزوري قشر په ملاتړ غوښتنې ځواب کړي نه د دې قشر په ځپلو، د ویرجنو میندو پر وړاندې دا تاوتریخوالی د وېرې او کمزورۍ ښکارندوی دی نه د پیاوړتیا او اختیار لرلو.

پرون شبنه کابل کې لسګونه مېرمنې پر کاج ښوونیز مرکز د جمعې ورځ د برید په غبرګون په لاریون را وتلې وې، چې د طالبانو له خوا په تاوتریخوالي واوښتې.

طالبانو د لاریون په ځای کې د ښځو د لاریون خورولو لپاره هوایي ډزې وکړې.

د لاریون یو شمېرې ګډونوالو مېرمنو په خواله رسنیو لیکلي چې د دوی له ډلې ځینې یې د طالبانو له خوا پر مخ په څپېړه هم ووهل شوې، همدا راز هغه انځورونه چې خواله رسنیو کې لاس په لاس شوي په کې ښکاري چې یو طالب د یوې مېرمنې لاسونه ولچک کوي.

یاد لاریون چې د طالبانو له خوا له تاوتریخوالي سره مخ شو په نړۍ کې توند غبرګونونه راپارولي.

افغانستان د ملګرو ملتونو سیاسي استازولۍ یا یوناما هم د طالبانو دا کار غندلی او زیاته کړې یې ده چې طالبان باید د ټولو افغانانو حقونه حفظ کړي او په سوله ایزو لاریونونو کې دې د وسلې له کارولو ډډه وکړي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More