fbpx

هندۍ فلمي ستورې (ارميلا) مسلمانه شوې؟

د هندي فلمونو نوموتې ستورې ارميلا ماټونډکر د هند په سياسي ګوند کانګريس کې ګډون وکړ او په دغه ګوند کې تر ګډون ٢٤ ساعته وروسته په ټولنيزو رسنيو دا اوازه خپره شوه، چې ارميلا مسلمانه شوې ده.

ارميلا، چې مشهور فلم (رنګيلا) څخه تر خپرېدو وروسته يې په هندي سينما کې لوى نوم پېدا کړ، دوه ورځې مخکې د کانګريس په ګوند کې ګډون وکړ او داسې هم ويل کېږي چې هغه به د کانګريس ګوند له خوا په ټاکنو کې هم برخه واخلي. خو په کانګريس کې تر ګډون ٢٤ ساعته وروسته په ټولنيزو رسنيو دا اوازه خپره شوه، چې ارميلا مسلمانه شوې ده او خپل نوم يې د ارميلا ماټونډکر پر ځاى مريم اختر مير ته بدل کړى دى.

خو بلخوا هندۍ وېبپاڼه بوم لايو ډاټ ان وايي، چې د ارميلا کانګريس ته په تګ ځينې خلک خپه دي او هغوى د ارميلا پر ضد دا تبليغات پيل کړي دي، چې هغه مسلمانه شوې ده. ارميلا په ٢٠١٦ کې د يوه سرمايه دار، محسن اختر مير سره واده کړى، کله چې رسنيو د هغه له خاوند څخه پوښتنه وکړه، نو هغه هم دا خبره وکړه، چې دا اوازې دي او د کانګريس مخالفين غواړي، چې ارميلا ناکامه کړي. هغه وويل چې داسې هېڅ نشته او نه هم ارميلا خپل نوم بدل کړى دى.

خو په ټولنيزو رسنيو کې چې کومې اوازې خپرې شوي، د هغې تر مخه چې ارميلا ماټونډکر مسلامه شوې ده او د خپل خاوند محسن اختر مير نوم ته يې خپل نوم بدل کړى، دوى وايي چې اوس نوموړې خپل نوم مريم اختر مير ايښى دى او چون په ټاکنو کې برخه اخلي، نو غواړي چې هندوان همداسې وساتي او ورته ووايي چې دا نه ده مسلمانه شوې.

همدا راز د کانګريس ګوند وياند سچن ساونت هم دغه اوازې رد کړي دي او ويلي يې دي، چې دا تبليغات د بي جى پي ګوند کوي او هغوى له اوسه د ارميلا د بريا څخه په تشويش کې دي.

ياده دې وي چې په هند کې اوس هم د بي جى پي (بهارتيه جنتا ګوند) حکومت دى، چې دا ګوند د هند د اوسني لومړي وزير نريندرا مودي دى.