fbpx

احمد شاه ابدالي سياليو کې نن بيا لوبډلې مېدان ته کوزېږي

د احمد شاه ابدالي فرسټ کلاس څلور ورځنيو سياليو کې نن درې لوبې بيا په کابل، کونړ او ننګرهار کې پيلېږي، چې په څلورمه لوبه کې به باند امیر زون او کابل، پنځمه کې بوست زون او مس عینک زون او په شپږمه کې به امو زون او سپين غر زون مخامخېږي.

يادې سيالۍ چې په کابل، کونړ او ننګرهار کې ترسره کېږي، درې لوبې يې مخکې ترسره شوي او نن به هره لوبډله خپله دوهمه لوبه پيلوي. دا د احمد شاه ابدالي څلور ورځنيو فرسټ کلاس سياليو دريم پړاو دی، چې د کرکټ بورډ د مسوولینو په وينا، دا ځل په ډېر ښه ډول ترسره کېږي.

په تېرو لوبو کې په لومړۍ لوبه کې امو زون او بند امیر زون یو بل سره مخامخ شول، چې په وروستۍ ورځ تر جالبې لوبې وروسته امو لوبډلې د بند امير لوبډله ماته کړه. په وروستۍ ورځ شرف الدین اشرف د مخالف لوبډلې ۷ لوبغاړي وسوځول او تر ټولو ښه لوبه يې وکړه. امو زون په منډو بريا ترلاسه کړه او د لوبې غوره لوبغاړی شرف الدین اشرف ونومول شو.

په دوهمه لوبه کې، چې د کابل او مس عینک زون ترمنځ ترسره شوه، په دريمه ورځ پای ته رسېدلې وه او کابل پکې په ستر توپير سره مس عینک زون مات کړی و. کابل لوبډلې په دغه لوبه کې په ۳۸۰ منډو مس عینک زون ته ماته ورکړه او د لوبې غوره لوبغاړی بيا نوین الحق نومول شوی و.

همدا راز په دريمه لوبه کې بیا سپين غر او بست لوبډلې مخامخ شوې وې، خو د دوی لوبه تر څلورمې ورځې پورې هم پای ته ونه رسېده او لوبه بې پايلې شوه. خو په لومړۍ پاڼۍ کې د ډېرو منډو له امله سپین غر زون ته ۱۳ نومرې ورکړل شوې او بهیر شاه محبوب غوره لوبغاړی ونومول شو.

نن یو ځل بيا شپږ واړه لوبډلې په درېو لوبغالو کې له یو بل سره لوبو ته مخامخېږي، دا به وروسته معلومه شوه چې د کومو لوبډلو لوبې څو ورځو کې پای ته رسېږي او څوک پکې لاسته راوړنې لري.