طالبان پاکستان ته: د افغان ښځينه کډوالو د تالاشۍ لپاره دې په بندرونو کې ښځينه کارکوونکې وګومارل شي

په تورخم او سپين بولدک کې د‌ افغان کډوالو او ښځينو سره د پاکستاني پولیسو وروستي چلندونو غبرګونونه راپارولي.

تازه طالبانو په دې برخه کې له پاکستان ځينې غوښتنې کړي دي.

د طالبانو د رياست الوزرا سياسي مرستيال عبدالکبير کابل کې د پاکستان له شارژدفير عبيد الرحمن نظامياني سره ليدنه کې له هغه غوښتي چې د افغان ښځينه کډوالو د تالاشۍ او کنټرول لپاره بندرونو کې ښځينه کارکوونکې وګومارئ.

نوموړي ويلي له دې کار زموږ موخه او هڅه دا ده چې د افغانستان له لوري پاکستان ته کوم خطر پېښ نه شي.

د طالبانو سياسي مرستيال عبدالکبير د پاکستان شارژدافير نظامياني ته ويلي چې د پاکستان له پخواني سفير او مامورينو کوم شکایت نه لري او ډېر ترې خوشاله وو.

د دغه طالب چارواکي خبرو د ځينو فعالانو غبرګونونه راپارولي.

د خواله رسنيو فعالان وايي د دې پر ځای چې د طالبان پاکستاني پوليسو د وروستيو بدو چلندونو له امله پاکستان سره جدي مخ ته لاړ شي او په وړاندې يې اقدام وکړي دوی ورته پستې خبرې کوي او د خپلو افغان کډوالو پوښتنه ترې نه شي کولی چې ولې د کډوالو د‌ ټولو قوانينو خلاف ورسره چلند کوي.

دا په داسې حال کې ده چې د تورخم او د چمن په دروازه کې د افغان کډوالو په ځانګړي توګه ښځينو سره د پاکستاني پولیسو له خوا بد چلند او بې عزتي کيږي او همدا رنګه د کراچۍ په زندانونو کې افغان کډوال شکنجه کيږي خو تر اوسه طالبانو د پاکستان د دې کارونو پر وړاندې کوم جدي غبرګون نه دی ښودلی.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More