طالبان هغه بريدګر پاکستان ته سپاري چې پاکستانی پوځي يې وژلی وو

د طالبانو او پاکستاني مسؤلينو ترمنځ نن یکشنبه د دروازې پر خلاصون ناسته شوې.

دغه ناسته په چمن کي شوې او نن اومه ورځ ده، چې د بولدک او چمن تر منځ دروازه د خلکو د تګ راتګ پر مخ بنده ده او په زرګونه مسافر دواړو خواو ته بند پاته دي.

خبريال ډاټ کام ته په رسېدلو معلوماتو کي ښيي، چي په دې ناسته کې د طالبانو د پلاوي څخه د بولدک ولسوالۍ امنيه قومندان مولوي محمود، د بولدک ولسوال ملا اغا، د بهرنيو چارو وزارت يو استازی مولوي عصمت الله او يو شمېر نور کسان شامل ول.

په ناسته کې د طالبانو استازو پاکستاني لوري ته د بلال په نوم د هغه بريد ګر چي په تېره یکشنبه يې يو پاکستانی نظامي وژلی و او دوه نور يې ټپيان کړل د ورسپارلو ژمنه ورکړې.

خبريال ډاټ کام ته د سیمې څخه باخبره سرچينو هغه تصويرونه هم لېږلي، چي د طالبانو استازي په يوه بايفور، يو لنډکروزر او فېلډر موټرونو کې چمن ته د دې ناستې د پاره ورغلي وو.

طالبانو او پاکستاني نظاميانو د دروازې دواړو غاړو ته په تمه شويو مسافرو ته هم ويلي، چې د دروزاې پر خلاصېدو د دوی خبرې روانې دي او ژر به دروازه خلاصه شي.

د طالبانو يو لوړ رتبه سرچينې خبريال ډاټ کام ته په استول شوي غږيز پيغام کي تاييد کړې، چي دروازه ممکن سبا یکشنبه خلاصه شي، ځکه په دې اړه د کابل او اسلام اباد تر منځ هم خبرې شوي او لا هم روانې دي.

خو د کندهار د والي دفتر په رسمي ډول وايي، چي تر اوسه د خبرو مثبته نتيجه معلومه نه ده خو تمه ښيي، چي دروازه به ژر خلاصه شي.

د يادونې وړ ده چې د دروازې دواړو خواو ته په زرګونه مسافر د ځای د نشتوالي له کبله پر ډاګ شپې ورځي تېروي چي ډېره برخه يې ناروغان هم دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More